গুৱাহাটী, 14 অক্টোবৰঃ দেওবাৰে মহানগৰীৰ নালাপৰাত সংঘটিত হোৱা গুলীচালনাৰ ঘটনা সন্দৰ্ভত আৰক্ষী আয়ুক্ত দীপক কুমাৰে সংবাদমাধ্যমক সম্বোধন কৰে ৷ নালাপৰাৰ লোহা ব্যৱসায়ী জেহেৰুল ইছলামক ভৰিত গুলীয়াই নিৰ্বিঘ্নে আঁতৰি গৈছিল দুজনীয়া দুৰ্বৃত্তৰ দলটো ৷ ঘটনা সন্দৰ্ভত সংবাদমাধ্যমক আৰক্ষী আয়ুক্তগৰাকীয়ে কেতবোৰ গুৰুত্বপূৰ্ণ মন্তব্য উল্লেখ কৰে ৷
লগতে পঢ়কঃ চৰ-কিল খাই গোলঘাটত চহৰৰ মাজমজিয়াত কোন এইজন স্বামী !
দেওবাৰে সন্ধিয়াৰ ভাগত বৰপেটাৰ বাসিন্দা জেহেৰুল ইছলামৰ ব্যৱসায়িক প্ৰতিষ্ঠানত প্ৰৱেশ কৰে দুজনীয়া দুৰ্বৃত্তই ৷ জেহেৰুলে দুবৃত্তই দাৱী কৰা ধন আদায় দিবলৈ অমান্তি নোহোৱাৰ বাবেই গুলীয়াই নিৰ্বিঘ্নে সেই স্থানৰ পৰা আঁতৰি যায় বুলি সন্দেহ কৰিছে আৰক্ষীয়ে ৷ গুলীচালনাত হস্তনিৰ্মিত .32 পিষ্টল ব্যৱহাৰ হৈছিল বুলি প্ৰকাশ কৰে আৰক্ষী আয়ুক্তগৰাকীয়ে ৷ আনহাতে জেহেৰুল ইছলামে আৰক্ষীৰ আগত দুয়োটা দুৰ্বৃত্তই স্থানীয় যুৱক আছিল বুলি চাঞ্চল্যকৰ তথ্য প্ৰকাশ কৰিছে ৷
অৱশ্যে তদন্তৰ খাতিৰত বহু কথা উল্লেখ কৰাৰ পৰা বিৰত থাকে আৰক্ষী আয়ুক্ত দীপক কুমাৰ ৷ ব্যক্তিগত কাৰণ নে অন্যান্য কিবা কাৰণত জেহেৰুলক গুলীওৱা হৈছিল সেই সন্দৰ্ভে আৰক্ষীয়ে তদন্ত অব্যাহত ৰাখিছে ৷