গুৱাহাটী, ২৩ জুলাই: গুৱাহাটী মহানগৰীৰ নলা-নৰ্দমা চাফা ৰখাৰ লগতে প্ৰদূষণ ৰোধৰ বাবে ৰাজ্য চৰকাৰে গ্ৰহণ কৰিছে বিশেষ পদক্ষেপ । এইক্ষেত্রত শেহতীয়া কেবিনেট বৈঠকত লোৱা হৈছে গুৰুত্বপূৰ্ণ সিদ্ধান্ত । অহা ২ অক্টোবৰৰ পৰা এবাৰ ব্যৱহাৰ হোৱা এক লিটাৰৰ তলৰ পানীৰ বটল বিক্ৰী কৰিব নোৱাৰিব ।
আনহাতে, অহা বছৰ ২ অক্টোবৰৰ পৰা দুই লিটাৰৰ তলৰ পানী বটল বিক্ৰী নিষিদ্ধ কৰা হ'ব । কেবিনেটৰ এই সিদ্ধান্তক লৈ ৰাজ্যজুৰি মিশ্ৰিত প্ৰতিক্ৰিয়াৰ সৃষ্টি হৈছে । বিভিন্ন দল-সংগঠনে ইয়াৰ বিৰোধিতা কৰাৰ বিপৰীতে একাংশই আদৰণি জনাইছে ।
লক্ষণীয় বিষয় যে, বৰ্তমান সময়ত প্লাষ্টিকৰ আৱৰ্জনাই গুৱাহাটী মহানগৰীত ভয়াৱহ সংকটৰ সৃষ্টি কৰিছে । কেন্দ্ৰীয় চৰকাৰৰ কঠোৰ নিষেধাজ্ঞাৰ পিচতো গুৱাহাটী মহানগৰীত এবাৰ ব্যৱহৃত প্লাষ্টিকৰ অবাধ প্রচলন হৈ আছে । বিভাগীয় কৰ্তৃপক্ষৰ গাফিলতিৰ বাবেই একাংশ অসাধু ব্যৱসায়ীয়ে এবাৰ ব্যৱহৃত প্লাষ্টিক মুকলিকৈ বিক্রী কৰি আহিছে ।
উল্লেখ্য যে, প্লাষ্টিকৰ অবাধ ব্যৱহাৰৰ ফলত মহানগৰীত ভয়াৱহ ৰূপত বৃদ্ধি পাইছে প্লাষ্টিকসৃষ্ট আৱৰ্জনা আৰু প্ৰদূষণ । প্রায় ২০ লাখ লোকে বসবাস কৰা গুৱাহাটী মহানগৰীত বিজ্ঞানসন্মতভাৱে আৱৰ্জনা সংগ্রহ আৰু পৰিশোধনৰ ব্যৱস্থা নোহোৱাৰ ফলশ্রুতিত বিভিন্ন স্থানত স্তূপীকৃত আৱৰ্জনাই ভয়াৱহ ৰূপত প্ৰদূষণ সৃষ্টি কৰিছে । গুৱাহাটী মহানগৰীত প্রতিদিনে প্রায় ৬০০ টন আৱৰ্জনা ওলায় । এই ৬০০ টন আৱৰ্জনাৰ ভিতৰত অধিকাংশই হৈছে প্লাষ্টিকসৃষ্ট আৱৰ্জনা ।
এনভাইৰন নামৰ এটা স্বেচ্ছাসেৱী সংগঠনে চলোৱা জৰীপৰ তথ্য অনুসৰি মহানগৰীত প্ৰতিদিনে ওলোৱা প্রায় ৬০০টন আৱৰ্জনাৰ ভিতৰত ৩৭০ টন আৱৰ্জনাই হৈছে প্লাষ্টিকসৃষ্ট আৱৰ্জনা । বিগত এটা দশকত গুৱাহাটী মহানগৰীত অস্বাভাৱিক হাৰত প্লাষ্টিকসৃষ্ট আৱৰ্জনাৰ পৰিমাণ বৃদ্ধি পাইছে । যাৰ ফলশ্ৰুতিত গুৱাহাটী মহানগৰীত পৰিৱেশ প্ৰদূষণ উদ্বেগজনকভাৱে বৃদ্ধি পাইছে ।