গুৱাহাটী,২৬ নৱেম্বৰ:ৰাজ্য চৰকাৰে কোটি কোটি টকা ব্য়য় কৰি গুৱাহাটী মহানগৰীত পদপথ, পদ দলং, উৰণীসেঁতু আৰু পথবিভাজক নিৰ্মাণ কৰি আছে যদিও যান-জঁটৰ সমস্যা সমাধানৰ বাবে কোনো গুৰুত্ব দিয়া নাই ৷ চৰকাৰৰ গুৰুত্বহীনতাৰ বাবে গুৱাহাটীৰ যান-জঁটৰ সমস্যাই ক্ৰমাৎ জটিল সমস্যাৰূপে গা কৰি উঠিছে (Traffic problems in Guwahati) ৷
তীব্ৰ যান-জঁটৰ বাবে গুৱাহাটীত এতিয়া যাতায়াত কৰাটো অতিকৈ কষ্টসাধ্য হৈ পৰিছে ৷ মহানগৰীৰ গুৱাহাটী-শ্বিলং পথ (GS Road),গোপীনাথ বৰদলৈ-মণিৰাম দেৱান পথ, দীনেশ গোস্বামী পথ, মহাত্মা গান্ধী পথ, ৰাধাগোবিন্দ বৰুৱা পথ, ৰাজেন্দ্ৰ প্ৰসাদ পথ, মাদাৰ টেৰেছা পথ, ৰাজগড় পথ আৰু এ কে আজাদ পথ আৰু এ টি ৰোড আদিত যান-জঁটৰ সমস্যাই জটিল ৰূপ ধাৰণ কৰিছে ৷ উল্লেখ্য় যে মহানগৰীৰ ৰাজপথৰ দাঁতিত অবৈধ পাৰ্কিং,চিটীবাছৰ দৌৰাত্ম্য, ব্যক্তিগত বাহনৰ চলাচল বৃদ্ধি আৰু যান-বাহন আৰক্ষীৰ নিয়ন্ত্ৰণহীনতা আদি কাৰকবোৰে যান-জঁট বৃদ্ধিত অৰিহণা যোগাই আহিছে ৷ গুৱাহাটী মহানগৰীৰ জনসংখ্যাৰ লগতে যান-বাহনৰ সংখ্যাৰ বৃদ্ধিয়ে বৰ্তমানৰ এই যান-জঁটৰ সমস্যাক অনাগত দিনত অধিক ভয়াৱহ কৰি তুলিব ৷
উল্লেখ্য যে গুৱাহাটী মহানগৰীৰ ২০১০ চনত জনসংখ্যা আছিল ১২,৪৪,৭১৩ গৰাকী (Population of Guwahati) ৷ ইয়াৰ বিপৰীতে ২০১৫ চনত ১৪,৯৮,৯৭০, ২০২০ চনত ১৮,০৫,১৬৩ আৰু ২০২৫ চনলৈ সংখ্যা ২১,৭৩,৯০২ গৰাকীলৈ বৃদ্ধি হোৱাৰ তথ্য চৰকাৰী সমীক্ষাত প্ৰকাশ কৰা হৈছে ৷ গুৱাহাটী মহানগৰ উন্নয়ন প্ৰাধিকৰণে গুৱাহাটীত চলোৱা এক সমীক্ষা অনুযায়ী মহানগৰীৰ ৰাজপথত চলাচল কৰা ব্যক্তিগত বাহনৰপৰা আৰম্ভ কৰি ৰাজহুৱা বাহনৰ সংখ্যা অনাগত সময়ত অভূতপূৰ্বভাৱে বৃদ্ধি পাব (GMDA) ৷
মহানগৰীৰ যান-জঁটৰ সমস্যা সমাধানত ব্য়ৰ্থ চৰকাৰ প্ৰাধিকৰণৰ সমীক্ষা মতে,২০০৪ চনত গুৱাহাটীৰ ৰাজপথত প্ৰতিদিনে চলাচল কৰা ১০,৯৪৯ খন দুচকীয়া বাহনৰ সংখ্যা ২০২৫ চনত ৬০,২১৯ খনলৈ বৃদ্ধি হ'ব ৷ সেইদৰে ২০০৪ চনত প্ৰতিদিনে চলাচল কৰা ৩,৯৩৯ খন অটোৰ সংখ্যা ২০২৫ চনত ১৪,৯৫৭ খনলৈ বৃদ্ধি হ'ব ৷ ২০০৪ চনত প্ৰতিদিনে চলাচল কৰা ১৫,৪৭৫ খন ব্যক্তিগত কাৰৰ সংখ্যা ২০২৫ চনত ৬৬,৯৪২ খনলৈ বৃদ্ধি হ'ব ৷ আনহাতে, ২০০৪ চনত প্ৰতিদিনে চলাচল কৰা ১,৬০৮ খন চিটীবাছৰ সংখ্যা ২০২৫ চনত ২,০১৩ খনলৈ বৃদ্ধি পাব (City Bus problem in Guwahati) ৷ ২০০৪ চনত প্ৰতিদিনে চলাচল কৰা ১১,৯৬৭ খন সামগ্ৰী কঢ়িওৱা বাহনৰ সংখ্যা ২০২৫ চনত ৩৮,৭৬৪ খনলৈ বৃদ্ধি হ'ব ৷
প্ৰাধিকৰণৰ সমীক্ষাত প্ৰকাশ পোৱা তথ্য অনুসৰি মহানগৰীৰ ভিতৰত ১৮.২ শতাংশ মানুহে খোজকাঢ়ি, ৪৪.৫ শতাংশ মানুহে ব্যক্তিগত বাহনত,৩০.২ শতাংশ মানুহে বাছত আৰু ৬.৭ শতাংশ মানুহে চাইকেল আদি অন্যান্য বাহনেৰে যাতায়াত কৰে । উল্লেখ্য যে মহানগৰীৰ যান-জঁটৰ অৱস্থাৰ পৰিৱৰ্তনৰ বাবে গুৱাহাটী মহানগৰ উন্নয়ন প্ৰাধিকৰণে প্ৰায় ১০ বছৰ পূৰ্বে এটা দীৰ্ঘম্যাদী পৰিকল্পনা যুগুত কৰিবলৈ আগবাঢ়িছিল ৷ প্ৰাধিকৰণে ‘কম্প্ৰিহেনছিভ ম'বিলিটী প্লেন’(Comprehensive Mobility Plan) চমুকৈ চি এম পি নামেৰে গুৱাহাটীৰ যান-বাহন আৰু ৰাজহুৱা পৰিবহণ ব্যৱস্থাৰ বাবে এই পৰিকল্পনা যুগুতকৰণৰ লক্ষ্য লৈছিল ৷ এই সন্দৰ্ভত নিবিদাও আহবান কৰা হৈছিল যদিও পিছত সকলো স্তব্ধ হৈ পৰিল (GMDA failed to implement CMP) ৷
লক্ষণীয়ভাৱে প্ৰাধিকৰণে গুৱাহাটীৰ বাবে প্ৰস্তুত কৰা সাধাৰণ মাষ্টাৰ প্লেনখন দীৰ্ঘদিন ধৰি ৰূপায়ণ নকৰাত মহানগৰীবাসীৰ মাজত প্ৰতিক্ৰিয়াৰ সৃষ্টি হৈছে ৷ একেদৰে যান-বাহন আৰু ৰাজহুৱা পৰিবহণৰ বাবে যুগুত কৰিবলৈ বিচৰা বিস্তাৰিত পৰিকল্পনা আৰম্ভণিৰ পৰ্যায়তে স্তব্ধ হৈ পৰে ৷ ৰাজধানী মহানগৰীকে ধৰি পাৰ্শ্বৱৰ্তী অঞ্চলত হোৱা দ্ৰুত নগৰীকৰণ আৰু বদ্ধিৰ্ত জনসংখ্যাৰ চাপ হ্ৰাস কৰিবলৈ এনে পৰিকল্পনাৰ আৱশ্যকতা দীৰ্ঘদিনৰপৰা অনুভৱ কৰা হৈছে ৷ পৰিকল্পনা অবিহনে ৰাজধানী মহানগৰীৰ উন্নয়নৰ গতিত স্থবিৰতা অহাটো নিশ্চিত ৷
প্ৰাধিকৰণৰ সূত্ৰ এটাই সদৰি কৰা মতে,গুৱাহাটীৰ স্বাভাৱিক উন্নয়নত সৃষ্টি হোৱা বাধাসমূহ অতিক্ৰম কৰিবলৈ পৰিকল্পনাটোত ২০১৫ চনৰ পৰা ৩০ বছৰ সময়ো স্থিৰ কৰা হৈছিল ৷ আগন্তুক তিনিটা দশকত গুৱাহাটীৰ ৰাজহুৱা পৰিবহণ ব্যৱস্থাৰ উল্লেখনীয় পৰিৱৰ্তন সাধন কৰি মহানগৰবাসীক সকাহ দিয়াৰ লক্ষ্য নিদ্ধাৰণ কৰা হৈছিল ৷ ৰাজ্য চৰকাৰৰ উদ্যোগত ৰূপায়ণ হ'বলগীয়া এই পৰিকল্পনা প্ৰস্তুতি পৰ্বতে স্থবিৰ হৈ পৰাত চৰকাৰী সদিচ্ছাৰ অভাৱ স্পষ্ট হৈ পৰিছে ৷ গুৱাহাটী উন্নয়ন বিভাগৰ হস্তক্ষেপৰ বাবেই এই পৰিকল্পনা স্থবিৰ হৈ পৰা বুলিও অভিযোগ উত্থাপিত হৈছে ৷
উল্লেখ্য যে ৭ বছৰ পূৰ্বে দৈনিক প্ৰায় চাৰি লাখ যান-বাহন চলাচল কৰা গুৱাহাটী মহানগৰীত চৰকাৰীভাৱে পাৰ্কিং স্থান নিৰ্মাণত ব্যৰ্থ হোৱাৰ পিছত'কম্প্ৰিহেনছিভ ম'বিলিটী প্লেন'ৰ স্থবিৰতাই আগন্তুক সময়ত যাতায়াত ব্যৱস্থা অধিক জটিল কৰাটো নিশ্চিত হৈ পৰিছে ৷ ইতিমধ্যে গুৱাহাটী স্মাৰ্ট চিটী প্ৰকল্পৰ কামো যোৱা ৬ বছৰ ধৰি কোনো অগ্ৰগতি হোৱা নাই । মাথো কিছুদিন পূৰ্বে মহানগৰীৰ কেইটামান প্ৰধানপথত স্বয়ংক্ৰিয় ট্ৰেফিক লাইট স্থাপন কৰি যানজট নিয়ন্ত্ৰণৰ প্ৰচেষ্টা হাতত লৈছে কিন্তু বহু সময়ত দেখা গৈছে এই ব্যৱস্থাই যানজঁট নিয়ন্ত্ৰণৰ পৰিৱৰ্তে যান-জঁট জটিলহে কৰিছে ।
লগতে পঢ়ক:Black Day of ULFA I : আলফা স্বাধীনৰ ক’লা দিৱসক লৈ শংকিত অসম আৰক্ষী
