গুৱাহাটী, ১৫ ফেব্ৰুৱাৰী :ঋণৰ ওপৰত ঋণ লৈ তৎ নোপোৱা অসম চৰকাৰে কিন্তু ৰাজ্যৰ উন্নয়নৰ বাবে কেন্দ্ৰীয় চৰকাৰে প্ৰদান কৰা ধন ব্যয় কৰাৰ ক্ষেত্ৰত চূড়ান্তভাৱে ব্যৰ্থ হৈছে (Central govt development fund to Assam) । লক্ষণীয় বিষয় যে, পুঁজিৰ অভাৱত ৰাজ্যৰ উন্নয়ন প্ৰক্ৰিয়া একপ্ৰকাৰ স্থবিৰ হৈ পৰিছে । কিন্তু তাৰ মাজতে কেন্দ্ৰই দিয়া পুঁজি ব্যয় কৰাত অসমৰ্থ হৈছে অসম চৰকাৰ । উল্লেখ্য যে, ৰাজ্যখনৰ আন্তঃগাঁথনি উন্নয়নৰ বাবে ড'নাৰ মন্ত্ৰালয়ে বিগত চাৰিটা বছৰত ৩৩ টা প্ৰকল্পৰ বাবদ ৮৮০.৮২ কোটি টকা অনুমোদন জনাইছিল (DoNER ministry priject to Assam) ।
কিন্তু চৰকাৰখনে আজিলৈকে এটাও প্রকল্প সমাপ্ত কৰিব পৰা নাই । আনকি বহুকেইটা প্ৰকল্পৰ ক্ষেত্ৰত ধন ব্যয়ৰ প্ৰমাণ-পত্ৰ দাখিল নকৰাৰ ফলত পৰৱৰ্তী কিস্তিৰ ধন প্ৰদান কৰিব পৰা নাই কেন্দ্ৰীয় চৰকাৰে । প্ৰকল্প ৰূপায়ণৰ ক্ষেত্ৰত ৰাজ্য চৰকাৰৰ এই ব্যর্থতা উদঙাই দি কেন্দ্ৰীয় ড’নাৰ মন্ত্ৰণালয়ে (Ministry of Development of North Eastern Region) প্ৰকাশ কৰা তথ্য অনুসৰি, উত্তৰ-পূব বিশেষ আন্তঃগাঁথনি উন্নয়ন আঁচনিৰ (NE Special Infrastructure Development Scheme, NESIDS) অধীনত ২০১৮-১৯ বিত্তীয় বৰ্ষৰ পৰা ২০২১-২২ বিত্তীয় বর্ষলৈকে মুঠ ১৪৫ টা প্ৰকল্পৰ অনুমোদন জনোৱা হৈছিল । ইয়াৰে ভিতৰত ৩৩ টা প্ৰকল্প হৈছে অসমৰ ।
কিন্তু ৮৮০.৮২ কোটি টকা ব্যয়সাপেক্ষ এই ৩৩ টা প্ৰকল্পৰ ভিতৰত এটা প্ৰকল্পৰ কামো এতিয়ালৈকে সম্পূৰ্ণ হৈ উঠা নাই (Utilization certificate of central govt projects) । তথ্য অনুসৰি, ২০১৮-১৯ বিত্তীয় বৰ্ষত অসমৰ ২০৯.৫৭ কোটি টকাৰ ৫ টা প্রকল্প, ২০১৯-২০ বিত্তীয় বৰ্ষত ৩০০.৩৬ কোটি টকাৰ ১২ টা প্রকল্প, ২০২০-২১ বিত্তীয় বৰ্ষত ৯৭.৪৯ কোটি টকাৰ এটা প্ৰকল্প আৰু ২০২১-২২ বিত্তীয় বৰ্ষত ২৭৩.৪০ কোটি টকাৰ ১৫ টা প্ৰকল্পত ড'নাৰ মন্ত্ৰালয়ে অনুমোদন জনাইছিল । উত্তৰ-পূব বিশেষ আন্তঃগাঁথনি উন্নয়ন আঁচনিৰ অধীনত ২০১৮-১৯ বিত্তীয় বৰ্ষত অনুমোদন জনোৱা প্ৰকল্পসমূহৰ ভিতৰত অন্যতম আছিল ৬৭.৭৬ কোটি টকাৰে নিৰ্মাণ কৰিবলগীয়া যোৰহাটৰ ন-আলিৰ অ'ভাৰব্ৰীজখন ।
কিন্তু তিনি লেনযুক্ত এই ৰে'ল অ'ভাব্ৰীজখনৰ কাম আজিলৈকে সমাপ্ত হোৱা নাই । প্ৰকল্পটোৰ বাবদ প্ৰদান কৰা ধনৰ ২৭.১০ কোটি টকাৰহে ব্যাৱহাৰিক প্রমাণ-পত্র লাভ কৰিছে কেন্দ্ৰই । একেদৰে ২০১৮-১৯ বিত্তীয় বৰ্ষত অনুমোদন জনোৱা ২৭.২০ কোটি টকাৰ তিনিচুকীয়া টাউন পানী যোগান প্ৰকল্পৰ ধনৰ ব্যাৱহাৰিক প্রমাণ-পত্ৰ এতিয়াও কেন্দ্রই লাভ কৰা নাই ।