গুৱাহাটী, ১৮ মাৰ্চ :বিত্ত মন্ত্ৰী অজন্তা নেওগে বুধবাৰে বিধানসভাত দাখিল কৰা ২০২২-২৩ বৰ্ষৰ বাজেটত (Finance Minister Ajanta Neog submits financial budget) গুৱাহাটীৰ উন্নয়নৰ বাবে কেতবোৰ আঁচনি আৰু পৰিকল্পনা ঘোষণা কৰিছে । ইয়াৰে কেতবোৰ আঁচনি আৰু পৰিকল্পনা পুৰণি । মনকৰিবলগীয়া যে পূৰ্বৰ বাজেটত গুৱাহাটীৰ উন্নয়নৰ বাবে ঘোষণা কৰা বহু আঁচনি আৰু পৰিকল্পনাৰ অগ্ৰগতিৰ সন্দৰ্ভত কোনো আলোচনা এইবাৰ বাজেটত দেখা নগ'ল ।
পুনৰ বিত্ত মন্ত্ৰী অজন্তা নেওগে ২০২২-২৩ বৰ্ষৰ বাজেটতো গুৱাহাটীৰ উন্নয়নৰ বাবে কেতবোৰ আঁচনি আৰু পৰিকল্পনা ঘোষণা কৰিছে যদিও খোৱাপানীকে ধৰি জাৱৰ পেলোৱা স্থানৰ সমস্যা আদি গুৱাহাটীৰ কেতবোৰ মৌলিক সমস্যাৰ লগতে ঐতিহ্য সংৰক্ষণ আৰু দীপৰ বিল, বৰচলা বিল আদিৰ সংৰক্ষণৰ কোনো কথা বাজেটত আলোচনা কৰা নাই । বাজেটত চলিত বিত্তীয় বৰ্ষত চৰকাৰে বৃহত্ত্বৰ গুৱাহাটীক সেউজীকৰণ কৰাৰ বাবে তিনি বছৰীয়া এক মাষ্টাৰ প্লেন (Master Plan) যুগুত কৰাৰ কথা উল্লেখ কৰিছে (Three year master plan to greenize Guwahati city)। গুৱাহাটীৰ পাহাৰ আৰু বনাঞ্চলসমূহক বেদখলকাৰীৰ কৱলৰ পৰা মুক্ত কৰাৰ বাবেও পদক্ষেপ গ্রহণ কৰা হৈছে বুলি বিত্ত মন্ত্ৰী গৰাকীয়ে উল্লেখ কৰিছে ।
উল্লেখ্য যে ২০১৩ চনতে বশিষ্ঠৰ ওচৰৰ গড়ভঙা পাহাৰত থকা এলেকাত চৰকাৰে পাহাৰ সংৰক্ষণৰ বাবে কৰা পাইলট প্ৰজেক্টটো আজিও আধৰুৱা হৈ আছে । এই সম্পৰ্কে বাজেটত কোনো আলোচনা কৰা নাই । আজিলৈকে চৰকাৰৰ হাতত গুৱাহাটীৰ পাহাৰত বসবাস কৰা জনসংখ্যাৰ সঠিক হিচাপ মজুত নাই ।
২০১৩ চনতে চৰকাৰৰ দ্বাৰা চিহ্নিত গুৱাহাটীৰ পাহাৰৰ ৩৬৫ টা ভূমিস্খলন প্ৰৱণ এলেকাৰ সুৰক্ষাৰ বাবে চৰকাৰে কি পদক্ষেপ গ্ৰহণ কৰিছে তাৰ কোনো কথা বাজেট উল্লেখ নাই । দীপৰ বিলৰ সংৰক্ষণৰ কথাও বাজেটত স্থান নাপালে । উল্লেখ্য যে দীপৰ বিলৰ পাৰ্শ্বৱৰ্তী পশ্চিম বৰাগাঁৱত মহানগৰীৰ সকলো আৱৰ্জনা পেলোৱাৰ পূৰ্বৰ স্থানত আৱৰ্জনা পেলোৱা কাৰ্য বন্ধ হ’ল যদিও তাৰ পৰিৱৰ্তে দীপৰ বিলৰ সমীপতে থকা বেলৰআলিত গুৱাহাটী পৌৰ নিগমে পুনৰ মহানগৰীৰ সমস্ত পেলনীয়া আৱৰ্জনা পেলাবলৈ আৰম্ভ কৰিছে ৷ যাৰ ফলত অঞ্চলটোৰ বিস্তীৰ্ণ অঞ্চল পুনৰ প্ৰদূষিত হ’বলৈ আৰম্ভ কৰিছে ।
লগতে ওচৰতে থকা পামহী নদী আৰু ৰামছাৰ আদি স্থান পুনৰ ভয়ংকৰভাৱে প্ৰদূষণৰ কবলত পাৰিছে । এই বিষয়টো বাজেটত এৰি চলা দেখা গৈছে । চৰকাৰী তথ্য মতে মহানগৰীৰ ৭০ শতাংশ মানুহে চৰকাৰী খোৱা পানী আঁচনিৰ পৰা বঞ্চিত । মহানগৰীত দৈনিক ২৫৬.৪৬ নিযুত লিটাৰ খোৱাপানীৰ নাটনি হৈ আছে ।
ইপিনে চৰম অনিশ্চয়তাৰে চলি আছে গুৱাহাটীৰ পানী যোগান প্ৰকল্পৰ (Guwahati water supply project) কাম । গুৱাহাটীবাসীক ২৪ ঘণ্টাই খোৱাপানী যোগান ধৰাৰ বাবে যোৱা ৮-৯ বছৰ ধৰি চলি থকা চাৰিটা পানী যোগান প্ৰকল্পৰ কাম চৰম দুৰ্নীতি আৰু অনিয়মৰ বাবে এটাও প্ৰকল্প সম্পূৰ্ণ হোৱা নাই । এই বিষয়ে বাজেটত কোনো কথা আলোচনা কৰা নাই ।