গুৱাহাটী, 13 মাৰ্চ :কেইবাটাও হত্যাকাণ্ড-অপৰাধৰ ঘটনাৰ চাঞ্চল্য ৰাজ্যজুৰি অব্যাহত থকাৰ মাজতে গুৱাহাটী মহানগৰীত সংঘটিত হৈছে আন একমানৱতাক ভুলুণ্ঠিত কৰাৰ ঘটনা ৷ কোনো হৃদয়হীন লোকে নৈত পেলায় থৈ গ’ল নৱজাতকক ৷ দেওবাৰে বেতকুচি ISBT ত উদ্ধাৰ মৃত নৱজাতক । বাহিনী নৈত উপঙি থকা অৱস্থাত উদ্ধাৰ কৰা হয় মৃতদেহটি । স্থানীয় লোকে প্ৰত্যক্ষ কৰাৰ পিছতে স্থানীয় গড়চুক আৰক্ষীক খবৰ দিয়ে । গুৱাহাটী মহানগৰীৰ বেতকুচিৰ সমীপৰ ISBT ৰ কাষতে থকা আজান ফকীৰ পথৰ বাহিনী নৈত ৰবিবাৰে বিয়লি স্থানীয় লোকে ভাহি থকা অৱস্থাত প্ৰত্যক্ষ কৰে নৱজাতকৰ মৃতদেহটো (Body of newborn baby recovered at ISBT) ৷
মৃতদেহটো স্থানীয় ৰাইজে প্ৰত্যক্ষ কৰাৰ পিছতে আৰক্ষীক খবৰ দিয়াত তৎক্ষণাতে ঘটনাস্থলীত উপস্থিত হৈ নৱজাতকৰ মৃতদেহটো উদ্ধাৰ কৰে । স্থানীয় ৰাইজে ঘটনা সন্দৰ্ভত প্ৰতিক্ৰিয়া ব্যক্ত কৰি নিজৰ অপকৰ্ম ঢাকিবলৈকে দেৱ শিশুটিক এনেদৰে হত্যা কৰা হয় তথা বাহিনী নৈত পেলাই দিবলৈকো কুণ্ঠাবোধ নকৰা বুলি উল্লেখ কৰে । নৱজাতকটি এদিন পূৰ্বে অৰ্থাৎ শনিবাৰে জন্ম পোৱা বুলি স্থানীয় ৰাইজৰ লগতে আৰক্ষীয়ে সন্দেহ প্ৰকাশ কৰিছে ৷ যিহেতু মৃতদেহটো গলিত অৱস্থাত পোৱা নাই সেয়েহে স্থানীয় ৰাইজৰ লগতে আৰক্ষীয়ে শনিবাৰে নৱজাতকটি জন্ম পোৱাৰ সন্দেহ প্ৰকাশ কৰিছে (Gorchuk Police recovered new bornbaby at Guwahati )।