মুখ্যমন্ত্ৰীৰ অনুষ্ঠানত কেটলি আৰু মাটিৰ গিলাচ; স্বচ্ছ, সেউজ আৰু সবল গাঁও অভিযানৰ শুভাৰম্ভণি

ছে ন' টু প্লাষ্টিক, ছে য়েছ টু ভলীবল । প্লাষ্টিক নহয়, ভলীবল গ্ৰহণ কৰাৰ আহ্বান । ভলীবলৰ জৰিয়তে স্বচ্ছ, সেউজ আৰু সবল গাঁও অভিযানৰ শুভাৰম্ভণি মুখ্যমন্ত্ৰী সৰ্বানন্দ সোণোৱালৰ ।

গুৱাহাটী, 1অক্টোবৰঃ মঙলবাৰে মহানগৰীৰ জজ্ খেলপথাৰত তেল আৰু প্ৰাকৃতিক গেছ নিগম আৰু গুৱাহাটী ভলীবল প্ৰশিক্ষণ কেন্দ্ৰৰ সহযোগত স্বচ্ছ, সেউজ আৰু সবল গাঁও অভিযানৰ শুভাৰম্ভ কৰে মুখ্যমন্ত্ৰী সৰ্বানন্দ সোণোৱালে ৷ ভলীবলৰ জৰিয়তে প্লাষ্টিকমুক্ত কৰাৰ সংকল্প লোৱাৰ বাবে এই কাৰ্যসূচীৰ আয়োজন কৰা হয় । এই অনুষ্ঠানত প্লাষ্টিক বৰ্জনৰ কার্যসূচী লোৱাৰ লগতে অ’ এন জি চি আৰু জনতাৰ চৰকাৰৰ দ্বাৰা ১১৫ খন গাঁৱক ভলীবল, বেগ আৰু বাঁহৰ ডাষ্টবিন প্ৰদান কৰা হয় । প্লাষ্টিক বৰ্জন কৰাৰ লগতে গ্ৰাম্য অঞ্চলৰ শিশুসকলক ভলীবলৰ প্ৰতি আকৰ্ষিত কৰাৰ বাবে গঠন হ’ব অসম ভলীবল মিছন-১০০ । অনুষ্ঠানত মুখ্যমন্ত্ৰী সোণোৱালে নিজৰ ভাষণত কয় যে পৰিষ্কাৰকৈ থাকিলেহে এখন সুস্থ সমাজ গঢ় লৈ উঠিব । এখন ৰাম ৰাজ্য হিচাপে গঢ় লৈ উঠাৰ বাবে প্ৰধানমন্ত্ৰীয়ে বিভিন্ন ধৰণৰ কাৰ্যসূচী গ্ৰহণ কৰিছে, য’ত শান্তি–সম্প্ৰীতি, স্বচ্ছতা সকলোবোৰ থাকে । দেশৰ পৰিৱৰ্তন আনিবলৈ হ’লে সকলোৱে নিজৰ নিজৰ দায়িত্ব পালন কৰিব লাগিব বুলি মন্তব্য কৰে মুখ্যমন্ত্ৰীগৰাকীয়ে ।

সাধাৰণতে চৰকাৰী কার্যসূচীত দেখা যোৱা প্লাষ্টিকৰ পানীৰ বটলৰ পৰিৱৰ্তে মঙলবাৰৰ অনুষ্ঠানত দেখা পোৱা গ'ল কেটলি আৰু মাটিৰ গিলাচ । লগতে অসমৰ গ্ৰাম্য অঞ্চলসমূহৰ পৰা ভলীবল খেলুৱৈ সকলে সংগ্ৰহ কৰি অনা প্লাষ্টিকৰ মোনা আৰু বটল সংশোধনৰ বাবে প্ৰেৰণ কৰা হয় ।