গুৱাহাটী,২০ ছেপ্টেম্বৰ: ৰোগী আৰু চিকিৎসকৰ মাজত সদায়ে সৌহাদ্যপূৰ্ণ সম্পৰ্কৰ পোষকতা কৰিছে ৰাজ্যপাল গোলাব চান্দ কাটাৰিয়াই । গুৱাহাটী চিকিৎসা মহাবিদ্যালয়ৰ ৬৩ সংখ্যক প্ৰতিষ্ঠা দিৱসত অংশ গ্ৰহণ কৰি বুধবাৰে ৰাজ্যপালগৰাকীয়ে কয় যে সমাজত চিকিৎসা বৃত্তি এক অতি সন্মানীয় পেচা । সৰ্বসাধাৰণ লোকৰ মাজত চিকিৎসকসকলৰ প্ৰতি অপৰিসীম সন্মান আৰু শ্ৰদ্ধা থাকে । সেয়ে চিকিৎসকসকলেও প্ৰতিগৰাকী ৰোগীৰ সৈতে অতি ভাল ব্যৱহাৰ কৰিব লাগে বুলি ৰাজ্যপালগৰাকীয়ে কয় ।
লগতে ৰোগীৰ চিকিৎসাত যাতে কোনো সুৰুঙা থাকি নাযায় সেয়া চিকিৎসকসকলে সুনিশ্চিত কৰিব লাগে বুলিও কয় । গুৱাহাটী চিকিৎসা মহাবিদ্যালয়ৰ প্ৰেক্ষাগৃহত আয়োজিত ৰাজ্যৰ এই দ্বিতীয়খন চিকিৎসা মহাবিদ্যালয়ৰ প্ৰতিষ্ঠা দিৱসত মুখ্য অতিথি হিচাপে অংশ গ্ৰহণ কৰে ৰাজ্যপাল কাটাৰিয়াই ।
ৰাজ্যৰ স্বাস্থ্য-পৰিয়াল কল্যাণ আৰু চিকিৎসা শিক্ষা-গৱেষণা দপ্তৰৰ মন্ত্ৰী কেশৱ মহন্তই বিশিষ্ট অতিথি হিচাপে উপস্থিত থকা অনুষ্ঠানটোত ৰাজ্যপাল গৰাকীয়ে কয় যে সৰ্বসাধাৰণ লোকৰ বাবে উপযুক্ত চিকিৎসা সেৱা সুনিশ্চিত কৰিবলৈ চৰকাৰে চলাই অহা প্ৰয়াসত চিকিৎসকসকলে অত্যন্ত মহত্বপূৰ্ণ অৰিহণা যোগাই আহিছে ।
১৯৬০ চনত প্ৰতিষ্ঠা লাভ কৰা অসম তথা উত্তৰ-পূৰ্বাঞ্চলৰ এই দ্বিতীয়খন চিকিৎসা মহাবিদ্যালয়ে অসমৰ স্বাস্থ্যসেৱা খণ্ডৰ উত্তৰণত প্ৰমুখ ভূমিকা গ্ৰহণ কৰি অহা বুলি দোহাৰি ৰাজ্যপালগৰাকীয়ে আগন্তুক দিনতো গুৱাহাটী চিকিৎসা মহাবিদ্যালয়ে এই ধাৰা নিষ্ঠাৰে অব্যাহত ৰাখিব বুলি আশা প্ৰকাশ কৰে ।
চিকিৎসা মহাবিদ্যালয় চিকিৎসালয়ত বহিঃৰোগী সেৱা বিভাগত (অ'পিডি) চিকিৎসা গ্ৰহণৰ বাবে দূৰ-দূৰণীৰ পৰা অহা ৰোগীয়ে দীঘলীয়া শাৰী পাতি বহুসময় অপেক্ষা কৰিব লগা হোৱাৰ দিশটো উনুকিয়াই ৰাজ্যপালগৰাকীয়ে প্ৰতিখন চিকিৎসা মহাবিদ্যালয় কৰ্তৃপক্ষকে ইয়াৰ উপযুক্ত সমাধান উলিয়াই ৰোগীসকলক সকাহ দিবলৈ দিহা দিয়ে ।
ৰাজ্যপাল কাটাৰিয়াই চিকিৎসা মহাবিদ্যালয় চিকিৎসালয়কে ধৰি সকলো চৰকাৰী চিকিৎসালয়েই সম্পূৰ্ণ চাফ-চিকুণ হৈ থকাটো সুনিশ্চিত কৰাৰো পোষকতা কৰে ।
অনুষ্ঠানত বিশিষ্ট অতিথি হিচাপে অংশগ্ৰহণ কৰা স্বাস্থ্য মন্ত্ৰী কেশৱ মহন্তই অসমত চিকিৎসা শিক্ষাৰ বাট কাটি থৈ যোৱা ব্ৰিটিছ চিকিৎসক ডাঃ জ'ন বেৰী হোৱাইটৰ অৱদানক শ্ৰদ্ধাৰে স্মৰণ কৰি ৰাজ্যখনৰ চিকিৎসা মহাবিদ্যালয়সমূহত চিকিৎসা বিজ্ঞানৰ শিক্ষা গ্ৰহণ কৰা প্ৰতিগৰাকী শিক্ষাৰ্থীকে ডাঃ হোৱাইটৰ মানৱপ্ৰেমৰ মহান আদৰ্শৰ দ্বাৰা উদ্বুদ্ধ হৈ জনসাধাৰণৰ মাজত চিকিৎসা সেৱা আগবঢ়াবলৈ আহ্বান জনায় ।
শৈক্ষিক দিশত নিৰন্তৰ উৎকৰ্ষতাৰে গুৱাহাটী চিকিৎসা মহাবিদ্যালয়ে আগন্তুক দিনত দেশৰ ভিতৰতে এখন নামজ্বলা চিকিৎসা শিক্ষানুষ্ঠানৰ ৰূপে প্ৰতিষ্ঠা লাভ কৰিবলৈ সক্ষম হ'ব বুলিও অনুষ্ঠানত আশা প্ৰকাশ কৰে মন্ত্ৰীগৰাকীয়ে । এইক্ষেত্ৰত প্ৰয়োজনীয় আন্তঃগাথঁনি সংবৰ্ধনৰ ক্ষেত্ৰত ৰাজ্য চৰকাৰে চিকিৎসা মহাবিদ্যালয়খনলৈ সকলো সহযোগিতা আগবঢ়াব বুলি দোহাৰি মন্ত্ৰী মহন্তই ৰাষ্ট্ৰীয় স্তৰত অসমৰ চিকিৎসা শিক্ষাৰ ক্ষেত্ৰখনক উজ্বলাই তোলাত গুৱাহাটী চিকিৎসা মহাবিদ্যালয়ে আগভাগ লোৱাৰ আহ্বান জনায় ।