নিউজ ডেস্ক, 16 আগষ্ট :তৃণমূল কংগ্ৰেছত যোগ দিলে কংগ্ৰেছৰ প্ৰাক্তন সাংসদ তথা মহিলা কংগ্ৰেছৰ প্ৰাক্তন সভাপতি সুস্মিতা দেবে ৷ তৃণমূল কংগ্ৰেছৰ ৰাষ্ট্ৰীয় সাধাৰণ সম্পাদক অভিষেক বেনাৰ্জী আৰু ৰাজ্যসভাৰ সাংসদ ডেৰেক অ’ব্ৰেইনে সুস্মিতা দেবক দললৈ আদৰণি জনায় ৷ তৃণমূলত যোগ দিয়াৰ পূৰ্বেই কংগ্ৰেছৰ অন্তৱৰ্তীকালিন সভাপতি ছোনিয়া গান্ধী লৈ পদত্যাগ পত্ৰ প্ৰেৰণ কৰে সুস্মিতা দেবে ৷
ইতিমধ্যে সুস্মিতা দেবৰ পদত্যাগ অসম প্ৰদেশ কংগ্ৰেছৰ বাবে মোক্ষম আঘাত হিচাপে পৰিগণিত হৈছে ৷ প্ৰাক্তন সাংসদগৰাকীয়ে সামাজিক মাধ্যমত নিজৰ Bio আপডেট কৰাৰ পাচতে তেওঁ কংগ্ৰেছ দল ত্যাগ কৰাক লৈ ব্যাপক চৰ্চা অব্যাহত আছিল ৷ দেবৰ দলত্যাগ সন্দৰ্ভত আনুষ্ঠানিকভাৱে কোনেও কোনো কথা প্ৰকাশ নকৰিলেও তেওঁৰ টুইটাৰ একাউণ্টৰ Bio আপডেট কৰাৰ পাচতে তেওঁ কংগ্ৰেছ দল ত্যাগ কৰা বুলি সকলোৱে ধাৰণা কৰি লৈছিল ৷
শেহতীয়াকৈ জ্যেষ্ঠ কংগ্ৰেছী নেতা তথা প্ৰাক্তন কেন্দ্ৰীয় মন্ত্ৰী কপিল ছিব্বালে শিলচৰৰ প্ৰাক্তন সাংসদগৰাকীয়ে দলৰ প্ৰাথমিক সদস্য পদ ত্যাগ কৰা বিষয়টো সুনিশ্চিত কৰে ৷ টুইটযোগে কংগ্ৰেছৰ জ্যেষ্ঠ নেতাগৰাকীয়ে সুস্মিতা দেবে দল ত্যাগ কৰাৰ কথা সদৰী কৰে ৷ তেওঁ কয় যে, যুৱশক্তিয়ে দল এৰি যোৱাৰ পৰিৱৰ্তে দলক শক্তিশালী কৰাৰ বৃদ্ধসকলে কৰা প্ৰচেষ্টাক জগৰীয়া কৰা হয় ৷