গুৱাহাটী, 11 এপ্ৰিল : COVID-১৯ অথবা কৰ'ণা ভাইৰাছৰ সংক্ৰমণৰ ভয়ত এতিয়া স্তব্ধ সমগ্ৰ বিশ্ব। ৰাজপথ জনশূন্য, নাই যান-বাহনৰ চলাচল, স্তব্ধ হৈ আছে উদ্যোগ সমূহৰ যন্ত্ৰ সমূহ, নাই প্ৰদূষণ, প্ৰকৃতিয়ে যেন মুক্তভাবে উশাহ ল'বলৈ সুযোগ পাইছে। মানৱ জাতি কিছু সময়ৰ বাবে ঘৰৰ ভিতৰত আবদ্ধ হৈ পৰাত আনন্দত আত্মহাৰা হৈছে জীৱকুল। এই সুযোগতে বন্যপ্ৰাণী সমূহে বাধাহীন ভাবে বিচৰণ কৰিছে ইফালৰ পৰা সিফাললৈ ৷ পক্ষীকূলেও সোৱাদ লৈছে পূৰ্বে কেতিয়াও সুযোগ নোপোৱা আৰ্দ্ৰভূমিৰ ।
কিন্তু, ইয়াৰ মাজতে পক্ষীকুলৰ বিচৰণস্থলী দ্বীপৰ বিলত মুক্ত মনে বিচৰণ কৰিব পৰা নাই পক্ষীসমূহে । তলাবন্ধৰ এই সংকটৰ সময়ত দিন হাজিৰা কৰি জীৱন নিৰ্বাহ কৰা লাখ লাখ লোক কৰ্মহীন হৈ পৰিছে যদিও জীৱিকাৰ দোহাই দি এচাম মাছ মৰীয়াই দ্বীপৰ বিলৰ বুকুত মৎস চিকাৰ অব্যাহত ৰখাৰ ফলত মুকলিভাবে বিচৰণৰ পৰা বঞ্চিত হ'ব লগা হৈছে বিলখনৰ অসংখ্য পক্ষী । "সজাগ থাকক, ঘৰত থাকক আৰু সুৰক্ষিত থাকক"শীৰ্ষক চৰকাৰৰ আহ্বানৰ যেন কোনো গুৰুত্বই নাই দ্বীপৰ বিলত । আন সময়ৰ দৰে বৰ্তমানেও দ্বীপৰ বিলত যিদৰে মাছ মৰীয়াৰ সকলে মৎস চিকাৰ অব্যাহত ৰাখিছে এই দৃশ্য প্ৰত্যক্ষ কৰিলে বিশ্ববাসী এক অদৃশ্য শত্ৰুৰ ভয়ত গৃহবন্দী হৈ আছে যেন অনুভৱ নহয় । এফালে দ্বীপৰ বিলৰ বুকুত মৎস চিকাৰ চলি থকাৰ সমান্তৰালকৈ পাৰত চলিছে দ্বীপৰ বিলৰ মাছৰ বিক্ৰী। বন বিভাগৰ লোকে বাৰম্বাৰ বাধা প্ৰদান কৰি আহিছে যদিও জীৱিকাৰ দোহাই দি এই সকল মাছ মৰীয়াই মাছৰ চিকাৰ আৰু বেপাৰ চলাই গৈছে দ্বীপৰ বিলত ।