কোৱাৰেন্টাইনঃ মুখ্যমন্ত্ৰীলৈ পত্ৰ প্ৰেৰণ প্ৰাক্তন মন্ত্ৰী জগদীশ ভূঞাৰ

মুখ্যমন্ত্ৰীৰ একালৰ সতীৰ্থ তথা প্ৰাক্তন মন্ত্ৰী জগদীশ ভূঞাৰ মুখ্যমন্ত্ৰীলৈ মুকলি পত্ৰ প্ৰেৰণ ৷ চেন্নাইৰ পৰা অসমলৈ উভতি অহা যুৱকৰ দল এটা কোৱাৰেন্টাইন কেন্দ্ৰৰ পৰা বঞ্চিত হোৱাৰ পিছত প্ৰাক্তন মন্ত্ৰী জগদীশ ভূঞাই একেৰাহে তিনিদিন ধৰি ব্যক্তিগতভাৱে চলোৱা চেষ্টাৰ পিছতহে লোককেইজনে কোৱাৰেন্টাইন কেন্দ্ৰত আশ্ৰয় পাবলৈ সক্ষম হয় । যাৰ ফলস্বৰূপে তেওঁ মুখ্যমন্ত্ৰীলৈ পত্ৰ প্ৰেৰণ কৰে ৷ ইয়াৰ লগতে, কোৱাৰেন্টাইন কেন্দ্ৰসমূহৰ শেহতীয়া অৱস্থাক লৈ প্ৰদেশ কংগ্ৰেছৰ সাধাৰণ সম্পাদক দূৰ্গাদাস বড়োৱেও নিজৰ ক্ষোভ ব্যক্ত কৰে ৷

গুৱাহাটী, 25 মে’:বহিঃৰাজ্যৰ পৰা প্ৰত্যাৱৰ্তন কৰা অসমৰ লোকসকলক চৰকাৰে কোৱাৰেন্টাইনৰ নামত ন্যূনতম সেৱাখিনিও আগবঢ়োৱাত ব্যৰ্থ হোৱাৰ অভিযোগ উত্থাপন হৈছে বিভিন্ন প্ৰান্তৰ পৰা । আনকি 14 মে'ত চেন্নাইৰ পৰা অসমলৈ উভতি অহা যুৱকৰ দল এটাই একমাত্ৰ চৰকাৰৰ ভুল নীতি, সমন্বয়হীনতা আৰু উপযুক্ত পৰিকল্পনাৰ অভাৱতে 51 ঘণ্টা জীয়াতু ভুগিবলগীয়া হৈছিল ।

মুখ্যমন্ত্ৰীৰ একালৰ সতীৰ্থ তথা প্ৰাক্তন মন্ত্ৰী জগদীশ ভূঞাই একেৰাহে তিনিদিন ধৰি ব্যক্তিগতভাৱে চলোৱা চেষ্টাৰ পিছতহে লোককেইজনে কোৱাৰেন্টাইন কেন্দ্ৰত আশ্ৰয় পাবলৈ সক্ষম হয় । ইয়াৰ পিছতে ভূঞাই সমস্ত ঘটনা বৰ্ণনা কৰি মুখ্যমন্ত্ৰীলৈ প্ৰেৰণ কৰে এখন দীঘলীয়া পত্ৰ । এই সমস্ত ঘটনাৰ বিৱৰণী ইটিভি ভাৰতকো ব্যক্ত কৰে প্ৰাক্তন মন্ত্ৰীগৰাকীয়ে ।

আনহাতে, কোৱাৰেন্টাইন কেন্দ্ৰসমূহৰ শেহতীয়া অৱস্থাক লৈ সৰৱ হৈ পৰিছে প্ৰদেশ কংগ্ৰেছৰ সাধাৰণ সম্পাদক দূৰ্গাদাস বড়ো । ইটিভি ভাৰতৰ আগত ক্ষোভ ব্যক্ত কৰি তেওঁ কয় যে, কোনোধৰণৰ বিজ্ঞানসন্মত ব্যৱস্থা নোহোৱাকৈয়ে সাজু কৰি তোলা হৈছে এই কেন্দ্ৰসমূহ । বৰ্তমান যি পৰিবেশত ইয়াক নিৰ্মাণ কৰা হৈছে, এনে পৰিৱেশত সংক্ৰমণৰ মাত্ৰাহে বৃদ্ধি হ’ব বুলি তেওঁ মন্তব্য কৰে । 8 খন বিচনাৰ ব্যৱস্থা থকা একেটা কোঠালিত 14/15 জনলৈকে থাকিবলৈ দিয়া হৈছে বুলি তেওঁ জানিবলৈ দিয়ে ।

লগতে পঢ়ক:দিল্লীত টেক্সি চালকৰ সৈতে ৰাহুল গান্ধীৰ বাৰ্তালাপ