গুৱাহাটী, 8 জুলাই : এতিয়াৰে পৰা অসমৰ আভিযান্ত্ৰিক মহাবিদ্যালয় আৰু পলিটেকনিকসমূহত অধ্যাপক, সহকাৰী অধ্যাপক আদি নিযুক্তিৰ ক্ষেত্ৰত অসম লোকসেৱা আয়োগ (APSC)ৰ কোনো দায়িত্ব নাথাকিব । দীৰ্ঘসময় ধৰি এই শৈক্ষিক প্ৰতিষ্ঠানসমূহত এনেধৰণৰ নিযুক্তিৰ প্ৰক্ৰিয়া লোকসেৱা আয়োগে পৰীক্ষাৰ জৰিয়তে সম্পন্ন কৰি আহিছিল । কিন্তু এতিয়াৰে পৰা আছাম ইঞ্জিনিয়াৰিং ৰিক্ৰুইটমেণ্ট এক্ট (Assam Engineering Recruitment Act)ৰ আধাৰত ৰাজ্য চৰকাৰে গঠন কৰি দিয়া এখন ব’ৰ্ডে আভিযান্ত্ৰিক মহাবিদ্যালয় আৰু পলিটেকনিকসমূহত এই নিযুক্তিৰ প্ৰক্ৰিয়া সম্পন্ন কৰিব । বৃহস্পতিবাৰে দিছপুৰত এক সংবাদমেলযোগে এই কথা প্ৰকাশ কৰে ৰাজ্যিক শিক্ষামন্ত্ৰী ডাঃ ৰণোজ পেগু (Dr Ranoj Pegu)ৱে ।
সংবাদমেলযোগে তেওঁ কয় যে, এই সিদ্ধান্ত ইতিমধ্যে ৰাজ্যিক কেবিনেট (Cabinet)য়ে গ্ৰহণ কৰিছে । ইয়াৰোপৰি কেবিনেটে আৰু কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছে । সেই অনুসৰি, এতিয়াৰে পৰা বিটিআৰ (BTR)ত বসবাস কৰি অহা নেপালী সম্প্ৰদায়ৰ লোকসকল গোৰ্খা প্ৰটেক্টেড ক্লাছ (Gorkha Protected Class)ত অন্তৰ্ভুক্ত হ’ব । 2005 চনৰ পূৰ্বৰ পৰা বসবাস কৰি অহা গোৰ্খাসকলে এই সুবিধা লাভ কৰিব বুলিও উল্লেখ কৰে শিক্ষামন্ত্ৰীগৰাকীয়ে ৷