গুৱাহাটী, 20 নৱেম্বৰ : গুৱাহাটী মহানগৰীকে ধৰি ৰাজ্যৰ ভিন্ন প্ৰান্তত শনিবাৰে দুপৰীয়া ভাগত অনুভূত হয় ভূমিকম্পৰ এক মৃদু জোকাৰণি ৷ প্ৰাপ্ত তথ্য অনুসৰি, ৰিখটাৰ স্কেলত 4.1 প্ৰাবল্যৰ ভূমিকম্পই জোকাৰি যায় গুৱাহাটী মহানগৰী(Earthquake Hits Guwahati) ৷
শনিবাৰে দুপৰীয়া 1.12 বজাত অনুভূত হোৱা ভূমিকম্প(Earthquake)ৰ অভিকেন্দ্ৰ আছিল কামৰূপ মহানগৰ । গুৱাহাটীৰ পৰা দক্ষিণ পশ্চিম দিশত 31 কিলোমিটাৰ দূৰত্বত এই অভিকেন্দ্ৰ আছিল বুলি জানিব পৰা গৈছে । ভূ-পৃষ্ঠৰ পৰা 10 কিলোমিটাৰ গভীৰতাত আছিল এই ভূমিকম্পটোৰ অভিকেন্দ্ৰ ।
গুৱাহাটীত ভূমিকম্পৰ জোকাৰণি ভূ-পৃষ্ঠৰ পৰা বেছি গভীৰতাত অভিকেন্দ্ৰ নোহোৱাৰ বাবেই 4.1 প্ৰাবল্যৰ ভূমিকম্পটোৰ কঁপনি বেছিকৈ অনুভূত হয় । এই ভূমিকম্পৰ ফলত ৰাজ্যত কোনোধৰণৰ ক্ষয়-ক্ষতি হোৱাৰ তথ্য বৰ্তমানলৈকে পোহৰলৈ অহা নাই । গুৱাহাটীৰ লগতে বৰপেটা, নলবাৰী, দৰং, মৰিগাঁও আদি জিলাসমূহতো অনুভূত হয় ভূমিকম্পটোৰ জোকাৰণি ।
উল্লেখ্য যে, চলিত বৰ্ষত কেইবাটাও সৰু-মধ্যমীয়া প্ৰাবল্যৰ ভূমিকম্পই জোকাৰি গৈছে সমগ্ৰ অসম । 2021 বৰ্ষত ৰাজ্যত অহা অধিকাংশ ভূমিকম্পৰে অভিকেন্দ্ৰ আছিল শোণিতপুৰ জিলা আৰু ইয়াৰ পাৰ্শ্বৱৰ্তী অঞ্চলসমূহ ।
লগতে পঢ়ক :বন্ধ হ’ব ৰাজ্যৰ দুকুৰি সৰু-বৰ জলসিঞ্চন প্রকল্প
