গুৱাহাটী, 23 অক্টোবৰ: আজি শাৰদীয় দুৰ্গোৎসৱৰ মহাসপ্তমী ৷ ৰাজ্যৰ ভিন্ন প্ৰান্তৰ সমান্তৰালকৈ গুৱাহাটী মহানগৰীতো চলিছে মহিষমৰ্দিনীৰ স্তুতি বন্দনা ৷ মহামাৰী ক'ৰণাৰ বাবে এইবাৰ মহানগৰীৰ কেইবাখনো ঐতিহাসিক পূজাস্থলীত মৃন্ময় মূৰ্তিৰ পৰিৱৰ্তে চলিছে ঘট পূজা ৷ কোনো আড়ম্বৰতা অথবা জাকজমকতা নোহোৱাকৈয়ে অতি সাধাৰণভাৱে সম্পূৰ্ণ ধৰ্মীয় ৰীতি-নীতিৰে কৰা হৈছে দেৱী দশভূজাৰ বন্দনা ৷ পূৰ্বতে গুৱাহাটী মহানগৰীত প্ৰায় পাঁচশৰো অধিক মণ্ডপত মহিষমৰ্দিনীৰ পূজা অৰ্চনা হয় যদিও এইবাৰ কৰ'ণা মহামাৰীৰ বাবে এই সংখ্যা তেনেই সীমিত ৷ কৰ'ণা প্ৰতিৰোধৰ বাবে জিলা প্ৰশাসন তথা ৰাজ্য চৰকাৰে আৰোপ কৰা কেতবোৰ বাধা নিষেধৰ বাবে অধিকাংশ পূজা সমিতিয়েই আয়োজন নকৰিলে পূজা ৷ যি সকলে কৰিছে সেইসমূহ পূজা সমিতিয়েও প্ৰশাসনে নিৰ্ধাৰণ কৰা অতি কম উচ্চতাৰ দেৱী প্ৰতিমা ব্যৱহাৰ কৰাৰ লগতে অধিকাংশ পূজা সমিতিয়েই মাত্ৰ ধৰ্মীয় পৰম্পৰা ৰক্ষা কৰি ঘট পূজাহে কৰা পৰিলক্ষিত হৈছে ৷
মহানগৰীৰ ফাঁচিবজাৰৰ ইতিহাস প্ৰসিদ্ধ "মা কৰুণাময়ী কালি মন্দিৰ"ৰ পূজাত এইবাৰ ভক্তগণক প্ৰৱেশ কৰাত বাধা আৰোপ কৰিছে মন্দিৰ কৰ্তৃপক্ষই ৷ ভক্ত সকলে যাতে দেৱী দশভূজাৰ পূজাৰ নামত মন্দিৰত প্ৰৱেশ কৰিব নোৱাৰে তাৰ বাবে মন্দিৰৰ মূল প্ৰৱেশ পথত তলা লগাই থোৱা পৰিলক্ষিত হৈছে ৷ সমান্তৰালভাৱে পাণ বজাৰৰ আন কেইবাখনো ইতিহাসপ্ৰসিদ্ধ পূজা স্থলীতো এইবাৰ পূজা অনুষ্ঠিত হোৱা দেখা নগ’ল ৷