Durand Cup Football Tournament :গুৱাহাটীত ৪ আগষ্টত ডুৰাণ্ড কাপ ফুটবলৰ উদ্বোধনী খেল

১৩২ সংখ্যক ডুৰাণ্ড কাপ ফুটবল প্ৰতিযোগিতাৰ ট্ৰফী উন্মোচন । ক্ৰীড়া মন্ত্ৰী নন্দিতা গাৰ্লোচাই উন্মোচন কৰে ডুৰাণ্ড কাপৰ ট্ৰফী । অহা ৪ আগষ্টৰ পৰা গুৱাহাটীৰ উপৰি কোকৰাঝাৰ আৰু কলকাতাত অনুষ্ঠিত হ'ব এই সন্মানীয় প্ৰতিযোগিতাখনি ।

গুৱাহাটী, ১৫ জুলাই: অহা ৪ আগষ্টত অনুষ্ঠিত হ'ব ১৩২ সংখ্যক ডুৰাণ্ড কাপ ফুটবল প্ৰতিযোগিতা । এছিয়া মহাদেশৰ সন্মানীয় ডুৰাণ্ড কাপ ফুটবল প্ৰতিযোগিতাখনি গুৱাহাটীৰ উপৰি কোকৰাঝাৰ আৰু কলকাতাত অনুষ্ঠিত হ'ব । দেশৰ অতি পুৰণি ডুৰাণ্ড কাপৰ উদ্বোধনী খেলখন ৪ আগষ্টত গুৱাহাটীৰ সৰুসজাই ষ্টেডিয়ামত অনুষ্ঠিত হ'ব । শনিবাৰে গুৱাহাটীৰ হোটেল ৰেডিশ্বন ব্লুত অনুষ্ঠিত সংবাদমেলত এই কথা সদৰি কৰে চীফ অফ ষ্টাফ ইষ্টার্ণ কমাণ্ড তথা ডুৰাণ্ড আয়োজক সমিতিৰ অধ্যক্ষ লেফটেনেন্ট জেনেৰেল ৰাণা প্ৰতাপ কলিতাই । উক্ত সংবাদমেলত অসমৰ ক্ৰীড়া মন্ত্ৰী নন্দিতা গাৰ্লোচাই ডুৰাণ্ড কাপৰ ট্ৰফী উন্মোচন কৰে ।

এক সংবাদমেলত লেফটেনেন্ট জেনেৰেল ৰাণা প্ৰতাপ কলিতাই কয় যে ১৩৫ বছৰ পুৰণি প্রতিযোগিতাখনি ৰাজ্যখনে দ্বিতীয় বাৰৰ বাবে আয়োজন কৰাৰ সুযোগ লাভ কৰিছে । ১০ খন লীগ মেচ গুৱাহাটীত অনুষ্ঠিত হ'ব । এখন কোৱাৰ্টাৰ ফাইনেল গুৱাহাটীত অনুষ্ঠিত হ'ব । ইপিনে, ছেমিফাইনেল আৰু ফাইনেল অনুষ্ঠিত হ'ব কলকাতাত । ভাৰতীয় সেনা বাহিনীৰ সৌজন্যত আৰু অসম চৰকাৰৰ সহযোগত আয়োজন কৰা হৈছে এই ঐতিহাসিক ফুটবল প্ৰতিযোগিতাখনি ।

সংবাদমেলত ক্ৰীড়া মন্ত্ৰী নন্দিতা গাৰ্লোচাই কয় উদ্যোক্তাসকলক ধন্যবাদ জ্ঞাপন কৰি কয় যে উত্তৰ-পূৰ্বাঞ্চলৰ ফুটবল প্ৰেমীৰ ই ভাল খবৰ । তেওঁ কয় যে ৰাজ্য চৰকাৰে ফুটবলৰ সেই সোণোৱালী দিন ঘূৰাই অনাৰ বাবে প্ৰচেষ্টা অব্যাহত ৰাখিছে । দেশৰ আগশাৰীৰ ফুটবল দলৰ ১০ খন ভাল খেল অসম তথা উত্তৰ-পূৰ্বাঞ্চলৰ ক্ৰীড়াপ্ৰেমীয়ে উপভোগ কৰিব পাৰিব । অসমত ক্ৰীড়াৰ আন্তঃগাঁঠনি উন্নত কৰাৰ বাবে চৰকাৰে গ্ৰহণ কৰা পদক্ষেপৰ বিষয়ে তেওঁ উল্লেখ কৰে ।

আনহাতে, ডুৰাণ্ড আয়োজক সমিতিৰ অধ্যক্ষ লেফটেনেন্ট জেনেৰেল ৰাণা প্ৰতাপ কলিতাই ৰাজ্যত ফুটবল খেলক অধিক জনপ্ৰিয় আৰু প্ৰসাৰৰ প্ৰচেষ্টাত উৎসাহিত কৰাৰ বাবে অসম চৰকাৰক ধন্যবাদ জ্ঞাপন কৰে । অসম চৰকাৰে অভূতপূর্ব সহযোগিতা আগবঢ়াইছে আৰু ই ৰাজ্যখনত খেলৰ বাবে এক নতুন আৰম্ভণিৰ সূচনা কৰিব বুলি তেওঁ কয় । উল্লেখ্য যে, এই প্ৰতিযোগিতাখনিত এইবাৰ ইণ্ডিয়ান ছুপাৰ লীগৰ ১২টা দলকে ধৰি দেশৰ ২৪ টা শীর্ষ দলে অংশ গ্ৰহণ কৰিছে । ফাইনেল খেলখন ৩ ছেপ্টেম্বৰত কলকাতাত অনুষ্ঠিত হ'ব।

গুৱাহাটীত অনুষ্ঠিত হ'বলগীয়া উদ্বোধনী খেলখন সকলোৰে বাবে মুকলি থাকিব । মাত্ৰ বাকী খেলসমূহৰ বাবে অনলাইন বা অফলাইনত টিকট ক্ৰয় কৰিব লাগিব । উল্লেখ্য় যে ডুৰাণ্ডৰ তিনিটা ট্ৰফী নখন চহৰ ভ্ৰমণ কৰিছে । আজি এই ট্ৰফী গুৱাহাটীত ভ্ৰমণ কৰি পিছত কোকৰাঝাৰলৈ যাব । লেফটেনেন্ট জেনেৰেল ৰাণা প্ৰতাপ কলিতাই জনায় যে এই প্ৰতিযোগিতাত এইবাৰ বাংলাদেশ আৰু নেপালৰ দলে অংশগ্ৰহণ কৰিব। এই ট্ৰফী কলকাতা পোৱাৰ আগতে বাংলাদেশ আৰু নেপাল ভ্ৰমণ কৰিব । এইবাৰ মণিপুৰৰ পৰিস্থিতি স্বাভাৱিক নোহোৱাৰ বাবে মণিপুৰৰ কোনো ফুটবলে দলে এই প্ৰতিযোগিতাত অংশগ্ৰহণ নকৰে বুলি তেওঁ কয় ।

লগতে পঢ়ক:Flood hits Dibrugarh : ডিব্ৰুগড়ত বুঢ়ীদিহিঙৰ ভয়ংকৰ ৰূপ, নিৰ্বিকাৰ ভূমিকাত জনপ্ৰতিনিধি