যান-বাহন আৰক্ষীৰ ওপৰত নিৰ্মম প্ৰহাৰ খোদ আৰক্ষী বিষয়াৰ

দিছপুৰ থানাত ভাৰপ্ৰাপ্ত আৰক্ষী বিষয়া অমিত সিং আৰু সঞ্জয় ৰাভাৰ বিৰুদ্ধে এজাহাৰ দাখিল খোদ যান-বাহন আৰক্ষীৰ কনিষ্টবলৰ

গুৱাহাটী, 5 ছেপ্টেম্বৰঃ দিছপুৰ যান-বাহন আৰক্ষী থানাৰ ভাৰপ্ৰাপ্ত আৰক্ষী বিষয়াৰ বিৰুদ্ধে দিছপুৰ থানাত এজাহাৰ দাখিল কৰিলে যান-বাহন আৰক্ষীৰ কনিষ্টবলে। ঘটনা সন্দৰ্ভত জানিব পৰা মতে সাগৰ ফুকন নামৰ যান-বাহন আৰক্ষীৰ কনিষ্টবল গৰাকী যোৱা 2 ছেপ্টেম্বৰৰ পৰা শাৰীৰিকভাৱে অসুস্থ হোৱাৰ ফলত 4 ছেপ্টেম্বৰৰ নিশা 9 বজাত তেওঁ ছুটি বিচাৰি ভাৰপ্ৰাপ্ত আৰক্ষী বিষয়া অমিত সিঙৰ ওচৰলৈ গৈ অৱগত কৰে।

কিন্তু ভাৰপ্ৰাপ্ত আৰক্ষী বিষয়া গৰাকীয়ে সাগৰ ফুকনৰ ওপৰত ক্ষোভিত হৈ সঞ্জয় ৰাভা নামৰ বিষয়াগৰাকী সহ থানাৰ ভিতৰলৈ টানি লৈ আহি সাগৰ ফুকনক শাৰীৰিকভাৱে প্ৰহাৰ কৰাৰ গুৰুতৰ অভিযোগ উত্থাপন হৈছে । আনহাতে ঘটনা সন্দৰ্ভত সাগৰ ফুকনে দিছপুৰ থানাত ভাৰপ্ৰাপ্ত বিষয়া অমিত সিঙ আৰু সঞ্জয় ৰাভাৰ বিৰুদ্ধে এজাহাৰ দাখিল কৰে ।