এইবাৰ অখিল গগৈৰ মুক্তিৰ দাবীত ডিজিটেল আন্দোলন

বিগত ৭ মাহে কাৰাগাৰত বন্দী হৈ আছে কৃষক নেতা অখিল গগৈ, ধৈৰ্য্য কোঁৱৰ, বিতু সোণোৱাল, মানস কোঁৱৰ । নাগৰিকত্ব সংশোধনী আইনৰ বিৰোধিতা কৰি চৰকাৰৰ ৰোষত পৰিছিল এই কেইগৰাকী কৃষক নেতা । বৃহস্পতিবাৰৰ পৰা অখিল গগৈসহ আন 'কা' বিৰোধী নেতাসকলৰ মুক্তিৰ দাবীত সামাজিক মাধ্যমত আৰম্ভ হৈছে হেজটেগেৰে এক ডিজিটেল আন্দোলন ।

গুৱাহাটী,৯ জুলাই: বিগত ৭ মাহে কাৰাগাৰত বন্দী হৈ আছে কৃষক নেতা অখিল গগৈ, ধৈৰ্য্য কোঁৱৰ, বিতু সোণোৱাল, মানস কোঁৱৰ । নাগৰিকত্ব সংশোধনী আইনৰ বিৰোধিতা কৰি চৰকাৰৰ ৰোষত পৰিছিল এই কেইগৰাকী কৃষক নেতা । চৰকাৰে ইটোৰ পিছত সিটো ধাৰা লগাই মুকলি আকাশৰ তললৈ অহাৰ পথ ৰুদ্ধ কৰি তুলিছে । বৃহস্পতিবাৰৰ পৰা অখিল গগৈসহ আন 'কা' বিৰোধী নেতাসকলৰ মুক্তিৰ দাবীত সামাজিক মাধ্যমত আৰম্ভ হৈছে এক ডিজিটেল আন্দোলন । ডিব্ৰুগড় বিশ্ববিদ্যালয়, গুৱাহাটী বিশ্ববিদ্যালয়ৰ ছাত্ৰসমাজৰ লগতে ৰাজ্যৰ সৰ্বস্তৰৰ নাগৰিকে অখিল গগৈৰ মুক্তিৰ দাবী তুলি সামাজিক মাধ্যমত আৰম্ভ কৰিছে এই হেজটেগৰ ডিজিটেল প্ৰতিবাদ ।

চ'ছিয়েল মেডিয়াত #ReleaseAkhilGogoi #JusticeForAkhilGogoi #ReleaseAllAntiCaaProtesters শীৰ্ষক হেজটেগেৰে আৰম্ভ কৰা এই ডিজিটেল আন্দোলনৰ জৰিয়তে সকলোৱে অখিল গগৈৰ মুক্তিৰ দাবী তুলিছে । উপযুক্ত প্ৰমাণ অবিহনেই গোচৰৰ ওপৰত গোচৰ জাপি অখিল গগৈক কাৰাগাৰত বন্দী কৰি ৰাখিছে বুলি চৰকাৰৰ বিৰুদ্ধে সকলোৱে অভিযোগ কৰিছে । যাৰ বাবে এনেদৰেই হেজটেগেৰে ছ'চিয়েল মেডিয়াত ডিজিটেল প্ৰতিবাদত নামিছে ৰাজ্যৰ শিক্ষাৰ্থী সমাজৰ লগতে সাধাৰণ নাগৰিক ।

ইফালে শেহতীয়াকৈ কাৰাগাৰতে অসুস্থ হৈ পৰিছে অখিল গগৈ আৰু তেওঁৰ সতীর্থ সকল । আটাইৰে ক'ভিড পজিটিভৰ স্বাৱ পৰীক্ষা কৰাত ধৈৰ্য্য কোঁৱৰ আৰু বিতু সোণোৱালৰ দেহত ক'ৰণা ভাইৰাছৰ উপস্থিতি ধৰা পৰিছে । বৰ্তমানলৈ অখিল গগৈ আৰু মানস কোঁৱৰৰ স্বাৱ পৰীক্ষাৰ ফলাফল অহা নাই ।

হেজটেগেৰে সতীৰ্থ সহিতে অখিল গগৈক মুক্তিৰ দাবীত ডিজিটেল আন্দোলন

উল্লেখ্য যে, কাৰাৰুদ্ধ অখিল গগৈকে ধৰি আন নেতাসকলৰ আশু আৰোগ্য কামণাৰে বুধবাৰে সন্ধিয়া ৰাজ্যৰ বিভিন্ন প্ৰান্তত বন্তি জ্বলাই ঈশ্বৰক সেৱা আগবঢ়োৱা পৰিলক্ষিত হয় ।

হেজটেগেৰে সতীৰ্থ সহিতে অখিল গগৈক মুক্তিৰ দাবীত ডিজিটেল আন্দোলন