নৱগ্ৰহত ৰাজ্যিক মৰ্যাদাৰে সম্পন্ন খগেন শৰ্মাৰ শেষকৃত্য

অসম প্ৰশাসনিক সেৱাত উত্তীৰ্ণ হৈ খগেন শৰ্মাই প্ৰশাসনিক বিষয়া হিচাপে যোগদান কৰে যদিও পৰৱৰ্তী সময়ত ভাৰতীয় আৰক্ষী সেৱাত উত্তীৰ্ণ হৈ ৰাজ্যখনৰ বিভিন্ন স্থানত সুদক্ষ আৰক্ষী বিষয়া হিচাপে কাৰ্যনিৰ্বাহ কৰি অসম আৰক্ষীৰ সৰ্বোচ্চ পদ আৰক্ষী সঞ্চালক প্ৰধানৰ পদত অধিষ্ঠিত হয় ৷

গুৱাহাটী, 26 অক্টোবৰঃ অৱশেষত পঞ্চভূতত বিলীন হ’ল প্ৰাক্তন আৰক্ষী সঞ্চালক প্ৰধান খগেন শৰ্মাৰ নশ্বৰ দেহ ৷ নৱগ্ৰহত ৰাজ্যিক মৰ্যাদাৰে শেষকৃত্য সম্পন্ন কৰা হয় খগেন শৰ্মাৰ ৷ তেখেতৰ শেষকৃত্য কাৰ্যসূচীত উপস্থিত থাকে আৰক্ষী আয়ুক্ত দীপক কুমাৰ, এ এচ টি ছি সঞ্চালক আনন্দ প্ৰকাশ তিবাৰীৰ লগতে আৰক্ষীৰ উচ্চ পদস্থ বিষয়াসকল ৷ দীৰ্ঘদিনধৰি কৰ্কট ৰোগত আক্ৰান্ত হৈ আছিল প্ৰাক্তন আৰক্ষী সঞ্চালক প্ৰধানগৰাকী ৷

১৯৫৫ চনত টিহুৰ গাতে লাগি থকা কণিমাৰা গাঁৱৰ জন্ম গ্ৰহন কৰা খগেন্দ্ৰ নাথ শৰ্মা কৃতী শিক্ষক প্ৰয়াত নগেন শৰ্মাৰ দ্বিতীয় পুত্ৰ আছিল | ১৯৭১ চনত শৰ্মাই টিহু হাইস্কুলৰ পৰা মেট্ৰিক পৰীক্ষাত অৱতীৰ্ণ হৈ ৰাজ্য খনৰ ভিতৰতে প্ৰথম স্থান লাভ কৰি সমগ্ৰ টিহু অঞ্চললৈ গৌৰৱ কঢ়িয়াই আনিছিল ৷ ১৯৭২ চনত তেওঁ কটন কলেজৰ পৰা প্ৰাক বিশ্ববিদ্যালয় পৰীক্ষাৰত ৰাজ্যখনৰ ভিতৰতে কলা শাখাতো ষষ্ঠ স্থান লাভ কৰিছিল । পৰৱৰ্তী সময়ত দৰ্শন শাস্ত্ৰত গুৱাহাটী বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰি তেওঁ বজালী মহাবিদ্যালয় আৰু তেজপুৰ মহাবিদ্যালয়ত কিছুদিনৰ বাবে প্ৰবক্তা হিচাপে কৰ্মৰত আছিল ৷

উল্লেখ্য যে, অসম প্ৰশাসনিক সেৱাত উত্তীৰ্ণ হৈ তেখেতে প্ৰশাসনিক বিষয়া হিচাপে যোগদান কৰে যদিও পৰৱৰ্তী সময়ত ভাৰতীয় আৰক্ষী সেৱাত উত্তীৰ্ণ হৈ ৰাজ্যখনৰ বিভিন্ন স্থানত সুদক্ষ আৰক্ষী বিষয়া হিচাপে কাৰ্যনিৰ্বাহ কৰি অসম আৰক্ষীৰ সৰ্বোচ্চ পদ আৰক্ষী সঞ্চালক প্ৰধানৰ পদত অধিষ্ঠিত হয় ৷ শৰ্মাৰ মৃত্যুত মুখ্যমন্ত্ৰী সৰ্বানন্দ সোণোৱালৰ লগতে ৰাজ্যবাসীয়ে গভীৰ শোক প্ৰকাশ কৰিছে ৷