অৱশেষত উদ্ধাৰ হ'ল ব্ৰহ্মপুত্ৰত নিৰুদ্দেশ হোৱা কিশোৰৰ মৃতদেহ

ব্ৰহ্মপুত্ৰত ছেল্ফি তুলিবলৈ গৈ শনিবাৰৰ পৰা নিৰুদ্দেশ হৈ আছিল এগৰাকী কিশোৰ ৷ অৱশেষত ব্ৰহ্মপুত্ৰৰ বুকুত উদ্ধাৰ হয় কিশোৰগৰাকীৰ মৃতদেহ ৷

গুৱাহাটী,18 নৱেম্বৰ:শনিবাৰে মহানগৰীৰ ধাৰাপুৰত ব্ৰহ্মপুত্ৰৰ বুকুত সংঘটিত হৈছিল এক অঘটন ৷ 5 বন্ধুৰ লগত ছেল্ফি তুলিবলৈ আহি নিৰুদ্দেশ হৈছিল মালিগাঁৱৰ বৰিপাৰাৰ সুমন সৰকাৰ। শনিবাৰে বিয়লিৰ ভাগত পাঁচগৰাকী সতীৰ্থৰ সৈতে ধাৰাপুৰৰ লুইতৰ পাৰত ফটো উঠিবলৈ আহিছিল সুমন সৰকাৰ। ছেল্ফি উঠাত মচগুল হৈ থকা সময়তে অকস্মাতে ভৰি পিছলি ব্ৰহ্মপুত্ৰ নদীত পৰে কিশোৰজন।

পিচত SDRF বাহিনীয়ে দুদিন ধৰি উদ্ধাৰ অভিযান চলাই যদিও কিশোৰগৰাকীক উদ্ধাৰ কৰিবলৈ সক্ষম নহয় ৷ অৱশেষত NDRF বাহিনী ঘটনাস্থলীত উপস্থিত হৈ দেওবাৰে অভিযান চলায় যদিও সোমবাৰে হে ব্ৰহ্মপুত্ৰৰ বুকুত উদ্ধাৰ কৰে সুমন সৰকাৰৰ মৃতদেহ। পিচত NDRF বাহিনীয়ে নদী আৰক্ষীক গতাই দিয়ে মৃতদেহটো । সম্প্ৰতি মৰণোত্তৰ পৰীক্ষাৰ বাবে GMCH লৈ প্ৰেৰণ কৰা হৈছে মৃতদেহটো ।

লগতে চাওক-মহানগৰীৰ মালিগাঁও নীলাচলপুৰত বাঘৰ আতংক