কটন বিশ্ববিদ্যালয়ৰ উপাচাৰ্যৰ বিৰুদ্ধে ছাত্ৰৰ অভিযোগ

কটনৰ 6 জনীয়া এটা দলে ৰাজ্যপালক সাক্ষাৎ কৰি কটনৰ উপাচাৰ্যৰ বিৰুদ্ধে স্মাৰক পত্ৰ দিয়াৰ পিছতে 28 আগষ্টত বিশ্ববিদ্যালয়ৰ আচাৰ্যগৰাকীয়ে সমগ্ৰ বিষয়ত তদন্ত কৰি 15 দিনৰ ভিতৰত উত্তৰ বিচাৰি পত্ৰ প্ৰেৰণ কৰিছে কটন বিশ্ববিদ্যালয়ৰ উপাচাৰ্যলৈ

গুৱাহাটী, 4 ছেপ্টেম্বৰঃকটন বিশ্ববিদ্যালয়ৰ আভ্যন্তৰীণ উন্নয়নৰ লগতে আন কিছু সমস্যাক দীৰ্ঘদিন ধৰি আঙুলিয়াই অহাৰ পিছতো বিশ্ববিদ্যালয়ৰ কৰ্তৃপক্ষই গুৰুত্ব নিদিয়াৰ অভিযোগত অসমৰ ৰাজ্যপাল তথা বিশ্ববিদ্যালয়ৰ আচাৰ্য জগদীশ মুখীক কটনৰ ছজনীয়া ছাত্ৰৰ এটা দলে স্মাৰক পত্ৰ প্ৰেৰণ কৰে । তাৰ পিছতে কটন বিশ্ববিদ্যালয়ৰ উপাচাৰ্য ভবেশ চন্দ্ৰ গোস্বামীয়ে অভিযোগকাৰী 6 জন শিক্ষাৰ্থীক ভৱিষ্যতে কটনত পঢ়িবলৈ নিদিয়াৰ ভাবুকি প্ৰদান কৰাৰ এক গুৰুতৰ অভিযোগ উত্থাপন কৰিছে ছাত্ৰকেইজনে৷

কটনৰ দুই প্ৰাক্তন সাধাৰণ সম্পাদক জিন্টু ঠাকুৰীয়া আৰু মনমোহন চুতীয়াৰ নেতৃত্বত 6 জনীয়া দলটোৱে ৰাজ্যপালক সাক্ষাৎ কৰি স্মাৰক পত্ৰ দিয়াৰ পিছতে 28 আগষ্টত বিশ্ববিদ্যালয়ৰ আচাৰ্যগৰাকীয়ে সমগ্ৰ বিষয়ত তদন্ত কৰি 15 দিনৰ ভিতৰত উত্তৰ বিচাৰি পত্ৰ প্ৰেৰণ কৰিছে কটন বিশ্ববিদ্যালয়ৰ উপাচাৰ্যলৈ। আচাৰ্যৰ হস্তক্ষেপৰ পিছতে সম্প্ৰতি কটন বিশ্ববিদ্যালয়ৰ ভিতৰচ'ৰাত প্ৰতিক্ৰিয়াৰ সৃষ্টি হৈছে। আনহাতে প্ৰাক্তন সাধাৰণ সম্পাদক জিন্টু ঠাকুৰীয়াই কটন বিশ্ববিদ্যালয়ৰ বৰ্তমানৰ অৱস্থা সমস্যাৰে ভাৰাক্ৰান্ত বুলিও মন্তব্য কৰে৷