গুৱাহাটী, ১৬ মে': COVID-19 ৰ বিৰুদ্ধে চলোৱা যুঁজখন যিহেতু দীঘলীয়া হ'ব, সেয়েহে ইয়াৰ প্ৰস্তুতিও দীৰ্ঘম্যাদী হ'ব লাগিব । এই মন্তব্য মুখ্যমন্ত্ৰী সৰ্বানন্দ সোণোৱালৰ । শনিবাৰে মুখ্যমন্ত্ৰীৰ চৰকাৰী বাসগৃহৰ পৰা ৰাজ্যৰ সকলো উপায়ুক্ত, আৰক্ষী অধীক্ষক, স্বাস্থ্য বিভাগৰ যুটীয়া সঞ্চালকসকল আৰু চিকিৎসা মহাবিদ্যালয়ৰ অধ্যক্ষসকলৰ সৈতে ভিডিঅ' কনফাৰেঞ্চত ভাগ লৈ এইদৰে মন্তব্য কৰে মুখ্যমন্ত্ৰী সোণোৱালে । উপায়ুক্ত, আৰক্ষী অধীক্ষকসকলে নিজা নিজা অঞ্চলত স্থানীয় সাংসদ, বিধায়ক, জিলাৰ দায়িত্ববাহী মন্ত্ৰী আদিক লগত লৈ সকলো ব্যৱস্থাপনা নিয়াৰিকৈ কৰিবলৈ নিৰ্দেশ দিয়ে মুখ্যমন্ত্ৰীয়ে । হোম কোৱাৰান্টাইনৰ ক্ষেত্ৰত স্থানীয়ভাবে পঞ্চায়ত প্ৰতিনিধি, গাওঁবুঢ়া, বাগিচাৰ চৰ্দাৰ আদিক লৈ একোখন কমিটি গঠন কৰিবলৈও নিৰ্দেশ দিয়ে মুখ্যমন্ত্ৰীয়ে ।
তাৰোপৰি হোম কোৱাৰান্টাইনত থকাসকলক যাতে কোনো কাৰণতে অৱজ্ঞাসূচক ব্যৱহাৰ কৰা নহয় তাৰ প্ৰতি দৃষ্টি ৰাখিবলৈও মুখ্যমন্ত্ৰী গৰাকীয়ে নিৰ্দেশ দিয়ে ।