গুৱাহাটী,14 জুন : মুখ্যমন্ত্ৰী ড৹ হিমন্ত বিশ্ব শৰ্মা (Dr Himanta Biswa Sarma)ই তেওঁৰ মন্ত্ৰীসভাৰ সদস্যসকলৰ বাবে আৰম্ভ কৰিছে এক নতুন নিয়ম । প্ৰতিগৰাকী মন্ত্ৰী (Minister)ৰ সৈতে একাধিক বিধায়ক (MLA)ক লৈ একোটা গোট গঠন কৰি দিছে মুখ্যমন্ত্ৰীয়ে । মিত্ৰদল অগপ (AGP) আৰু ইউপিপিএল (UPPL)ৰ বিধায়কসকলকো সংলগ্ন কৰা হৈছে এই গোটত । নতুন নিয়ম অনুসৰি, মন্ত্ৰীসকলে তেওঁলোকৰ লগত সংলগ্ন কৰি দিয়া বিধায়কৰ গোটসমূহৰ সৈতে নিয়মীয়াকৈ যোগাযোগ ৰক্ষা কৰি চলিব ।
ইয়াৰোপৰি, প্ৰতিমাহৰ দ্বিতীয় আৰু চতুৰ্থ মঙলবাৰে নিজ নিজ গোটত থকা বিধায়কসকলক নিজ ঘৰলৈ নৈশ ভোজনৰ বাবে আমন্ত্ৰণ জনাব লাগিব মন্ত্ৰীসকলে । সেই নৈশ ভোজনতে চৰকাৰখনৰ কাম-কাজ সন্দৰ্ভত যদি কিবা আসোঁৱাহ আছে বা ৰাইজে চৰকাৰখনৰ বিষয়ে কি ভাবে ইত্যাদি কথাবিলাক কিম্বা অভিযোগসমূহ বিধায়কসকলে নিজা নিজা গোটৰ মন্ত্ৰীসকলক অৱগত কৰিব আৰু সেইসমূহ সংশ্লিষ্ট মন্ত্ৰীয়ে লিপিবদ্ধ কৰি প্ৰতি বুধবাৰে কেবিনেট বৈঠকৰ অন্তত মুখ্যমন্ত্ৰীৰ দৃষ্টিগোচৰ কৰিব ।
জানো আহক কোন মন্ত্ৰীৰ সৈতে কোন কোন বিধায়কক লৈ এই গোট গঠন কৰি দিছে মুখ্যমন্ত্ৰীয়ে । মুখ্যমন্ত্ৰী ড৹ শৰ্মাৰ গোটটোত থাকিব বিধায়ক অজয় কুমাৰ ৰায়, ৰীপক শৰ্মা, জিতু গোস্বামী, বিশ্বজিৎ ফুকন, ডাঃ নোমল মমিন আৰু ৰূপেশ গোৱালা । মন্ত্ৰী ৰণজিৎ দাসৰ লগত থাকিব বিধায়ক অতুল বৰা, সিদ্ধাৰ্থ ভট্টাচাৰ্য, ৰঞ্জিৎ দত্ত আৰু পদ্ম হাজৰিকা । মন্ত্ৰী অতুল বৰাৰ লগত থাকিব বিধায়ক নন্দিতা গাৰ্লোচা, ফণীভূষন চৌধুৰী, ভূপেন বড়ো আৰু বিদ্যাছিং ইংলেং । মন্ত্ৰী উৰ্খাও গৌৰা ব্ৰহ্মৰ লগত থাকিব বিধায়ক জয়ন্ত বসুমতাৰী, ভাস্কৰ শৰ্মা, গোবিন্দ বসুমতাৰী আৰু পৃথ্বীৰাজ ৰাভা । মন্ত্ৰী চন্দ্ৰমোহন পাটোৱাৰীৰ লগত দিয়া হৈছে বিধায়ক ৰমেন্দ্ৰ নাৰায়ণ কলিতা, হিতেন্দ্ৰ নাথ গোস্বামী, ভৱেশ কলিতা, প্ৰদীপ হাজৰিকাক ।