নিউজ ডেস্ক,20 মে’ : দেশত মহামাৰী ক’ৰণাই ভয়াৱহ ৰূপ ধাৰণ কৰাৰ সময়তে ৰাজ্যবাসীৰ বাবে আংশিক লক ডাউনে কিছু আশাৰ বতৰা কঢ়িয়াই আনিছে ৷ শেহতীয়াকৈ ৰাজ্যত নতুনকৈ গঠন হোৱা চৰকাৰ খনে ক’ভিড-19 ৰ পৰিস্থিতি নিয়ন্ত্ৰণৰ বাবে কেতবোৰ নতুন নীতি-নিৰ্দেশনা জাৰি কৰিছিল ৷
সেই অনুসৰি ৰাজ্যত সৰ্ম্পূণ কঠোৰ হাতেৰে সমগ্ৰ ক’ভিড-19ৰ পৰিস্থিতি নিয়ন্ত্ৰৰ বাবে আৰক্ষী, প্ৰশাসন, স্বাস্থ্য বিভাগৰ লোক সকলে দিনে নিশাই ব্যস্ত হৈ পৰিছে ৷ সম্প্ৰতি সেই সমূহ ক’ভিডৰ নতুন নীতি নিয়ম ভালদৰে পালন কৰাৰ বাবে ৰাজ্যত বিগত কিছু দিনৰ পৰা ক’ভিড আক্ৰান্ত আৰু মৃতৰ সংখ্যা হ্ৰাস হোৱা পৰিলক্ষিত হৈছে ৷
সম্প্ৰতি ক’ভিডৰ ভয়াৱহ সংক্ৰমণ ৰোধ কৰিবলৈ তৎপৰ হৈ পৰিছে ৰাজ্য চৰকাৰ ৷ মুখ্যমন্ত্ৰী ড৹ হিমন্ত বিশ্ব শৰ্মাই ইতিমধ্যে প্ৰতিগৰাকী বিধায়ককে নিজ নিজ সমষ্টিৰ ক’ভিড পৰিস্থিতিৰ বুজ ল’বলৈ নিৰ্দেশ প্ৰদান কৰে ৷
ইয়াৰ লেখীয়াকৈ স্বয়ং মুখ্যমন্ত্ৰী শৰ্মাই ক’ভিড পৰিস্থিতিৰ বুজ ল’বলৈ ৰাজ্যৰ ভিন্ন প্ৰান্তৰ হাস্পতালত উপস্থিত হোৱা পৰিলক্ষিত হৈছে ৷ বৃহস্পতিবাৰে বৰপেটা মেডিকেল কলেজ হাস্পতালত উপস্থিত হৈ হাস্পতালখনৰ সামগ্ৰিক দিশৰ বুজ লয় মুখ্যমন্ত্ৰীগৰাকীয়ে ৷ হাস্পতালখনত পৰৱৰ্তী দুদিনৰ ভিতৰত পুনৰ 15 খন আইচিইউযুক্ত বিচনা স্থাপন কৰা হ’ব ৷ লগতে শুকুৰবাৰৰ দিনটোৰ ভিতৰতে বৰপেটা মেডিকেল কলেজ হাস্পতাললৈ 50 টা অক্সিজেন কনচেণ্ট্ৰেটৰ যোগান ধৰাৰ কথা ঘোষণা কৰে ৷