গুৱাহাটী, ২৬ ছেপ্তেম্বৰ: তামিলনাডুৰ ভেলোৰত আজি মুকলি হ’ল এটি অসম ভৱন ৷ মুখ্যমন্ত্ৰী ড৹ হিমন্ত বিশ্ব শৰ্মাই মুকলি কৰিলে আঠ মহলীয়া অত্যাধুনিক সকলো সুবিধাযুক্ত এই নতুন অসম ভৱনটি । মঙলবাৰে দুপৰীয়া আনুষ্ঠানিকভাৱে মুখ্যমন্ত্ৰীগৰাকীয়ে অসমৰ ৰাইজৰ বাবে উৎসৰ্গা কৰিলে অসম ভৱন ৷
আজিৰে পৰা কাৰ্যক্ষম হৈছে তামিলনাডুৰ ৰাজধানী চেন্নাইৰ পৰা ১৩৮ কিলোমিটাৰ দূৰৰ ভেলোৰৰ চাতুভাছাৰীত নিৰ্মিত অসম ভৱনটি ৷ মুঠ ২৩ কোটি টকাৰে নিৰ্মিত এই ভৱনটিত আছে ৪০ টা দুখন বিচনাযুক্ত কোঠা, ২টা ভিআইপি/ভিআইআইপি ছুইট, সাতখন বিচনাযুক্ত মহিলা সংৰক্ষিত ১টা কোঠা, ৫ খন বিচনাযুক্ত পুৰুষ সংৰক্ষিত কোঠা ৩ টা কোঠা, চাৰিখন বিচনাযুক্ত ৩ টা কোঠা ৷ আজিৰ পৰা কাৰ্যক্ষম কৰাৰ উদ্দেশ্যেৰে অসম চৰকাৰে ইতিমধ্যে কৰ্মচাৰীও নিয়োগ কৰিছে ।
অসমৰ পৰা প্ৰতি বছৰে বৃহৎ সংখ্যক লোক কৰ্কটকে ধৰি বিভিন্ন ৰোগৰ চিকিৎসা কৰিবৰ বাবে ভেলোৰলৈ যায় । ভেলোৰৰ নতুন অসম ভৱনটিয়ে ৰোগী আৰু ৰোগীৰ আত্মীয় সকললৈ সামান্য হ’লেও সকাহ আনিব বুলি ভৱনটি মুকলি কৰি আশা প্ৰকাশ কৰে মুখ্যমন্ত্ৰী ড৹ হিমন্ত বিশ্ব শৰ্মাই ।