পকী দলং বিচাৰি ছয়গাঁৱত প্ৰতিবাদ

এখন পকী দলং বিচাৰি ৰাইজৰ অভিনৱ প্ৰতিবাদ ৷ দক্ষিণ কামৰূপৰ জেজাৰবৰি আৰু জিয়াকুৰকে ধৰি কেইবাখনো গাঁৱৰ আয়তী সকলে নাঁৱত উঠি নাম গাই, ভকতে বাঁহৰ দলঙৰ ওপৰত গীতা পঢ়ি চৰকাৰৰ বিৰুদ্ধে প্ৰতিবাদ সাব্যস্ত কৰে ৷

ছয়গাঁও, ১ আগষ্ট : ৰাজ্যৰ পৰিৱৰ্তনকামী চৰকাৰ খনৰ উন্নয়নৰ নমুনা পুনৰবাৰ পোহৰলৈ আহিছে দক্ষিণ কামৰূপৰ পলাশবাৰী সমষ্টিত । সমষ্টিটোৰ আমতলা জিয়াকুৰ গাওঁ পঞ্চায়তৰ অন্তৰ্গত জীয়াকুৰ-জেজাৰবৰীকে ধৰি প্ৰায় ৬০ খন গাঁৱক সংলগ্ন কৰা কলহী নদীৰ ওপৰত থকা বাঁহৰ দলংখনে বছৰ বছৰ ধৰি জীয়াতু ভোগাই আহিছে স্থানীয় ৰাইজক । সময়ে সময়ে স্থানীয় ৰাইজে নানা প্ৰতিবাদ,বিধায়কৰ ওচৰত তাঁত-বাতি কৰিও সুফল নোপোৱাত অৱশেষত নাঁৱত দিহানাম গাই, দলঙৰ ওপৰত গীতাপাঠ কৰি প্ৰতিবাদ সাব্যস্ত কৰে । কণ কণ স্কুলীয়া শিক্ষাৰ্থীৰ পৰা আবাল বৃদ্ধ বণিতা সকলো ওলাই আহি এই প্ৰতিবাদত অংশগ্ৰহণ কৰে ।

উল্লেখযোগ্য যে ৰাইজৰ গাঁঠিৰ ধনেৰে প্ৰতিবাৰেই দলংখন নিৰ্মাণ কৰে যদিও বানে আকৌ উটুৱাই লৈ যায়। ফলত দুৰ্বিসহ যাতায়ত কৰিব লগীয়া হৈছে স্থানীয় ৰাইজে । উল্লেখযোগ্য যে এই দলংখন নিৰ্মাণ নকৰাৰ বাবেই দলঙৰ পৰা পৰি ইতিমধ্যে কেইবাজনো লোকৰ মৃত্যু হৈছে । আনহাতে বৰ্তমানৰ বিধায়ক তথা পূৰ্বেও দুবাৰকৈ বিধায়ক হোৱা প্ৰণৱ কলিতায়ো এই ক্ষেত্ৰত কোনো গুৰুত্ব নিদিয়াত ক্ষোভিত হৈ পৰিছে স্থানীয় ৰাইজ৷