গুৱাহাটী, 31 মাৰ্চ: “আমাৰ কংগ্ৰেছটোৱেই ভাল আছিল । বিজেপিৰ কোনো কাম নাই ৷ আৰ এছ এছে চলায় ৷ মই একো শান্তি পোৱা নাই ৷ মোৰ এই কাৰণেই কংগ্ৰেছৰ ওপৰত খং উঠি থাকে যে মোক নেতা হ’ব নিদিলে ৷” কংগ্ৰেছত মুখ্যমন্ত্ৰীৰ গুপ্তচৰ প্ৰসংগই ৰাজনীতি উত্তাল কৰি ৰখাৰ সময়তে এয়া অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ ভাষ্য বুলি দাবী অসম প্ৰদেশ কংগ্ৰেছৰ সভাপতি ভূপেন বৰাৰ (Bhpen Borah criticizes Assam CM) ৷
অসম বিধানসভাৰ মজিয়াত মুখ্যমন্ত্ৰী ড৹ হিমন্তবিশ্ব শৰ্মাই কংগ্ৰেছ বিধায়িনী দলৰ গোপন কথা কংগ্ৰেছৰ বিধায়কেই জনায় বুলি দাবী কৰাৰ পিচত শুকুৰবাৰে সাংবাদিকৰ প্ৰশ্নৰ উত্তৰত তেওঁ পুনৰ কংগ্ৰেছক টাৰ্গেট কৰি লয় ৷ মুখ্যমন্ত্ৰীয়ে কয়, “কংগ্ৰেছৰ সবেই মোৰ সৈতে কথা পাতে ৷ 22 বছৰ কংগ্ৰেছ কৰিলো, গতিকে প্ৰায় সকলোৱেই মোৰ লগত কথা পাতে ৷’’ এই প্ৰসংগতে হিমন্ত বিশ্ব শৰ্মাক উভতি ধৰে APCC ৰ সভাপতি ভূপেন বৰাই (APCC president Bhupen Borah) ৷
সাংবাদিকৰ সন্মুখত প্ৰদেশ কংগ্ৰেছৰ সভাপতি গৰাকীয়ে কয়, “মুখ্যমন্ত্ৰীয়ে কিছু কংগ্ৰেছীৰ লগত যে কথা-বতৰা পাতে সেইটো মই জানো ৷ কিন্তু মোৰ লগত কথা-বতৰা হোৱা নাই বা হ’বলগীয়া নাই ৷ কিন্তু আমাৰ এজন জ্যেষ্ঠ নেতাই হিমন্ত বিশ্ব শৰ্মাৰ সৈতে কথা পাতোতে লাউড স্পীকাৰত শুনাইছিল ৷ তেতিয়াই তেওঁ কৈছিল বিজেপিটো এটা ফাল্টু পাৰ্টী ৷” (Bhupen Borah on HBS)