গুৱাহাটী, 30 ডিচেম্বৰ : বিধানসভাৰ শীতকালীন অধিবেশনৰ অন্তিম দিনা সদনত গৃহীত হয় 'বড়ো-কছাৰী উন্নয়ন স্বায়ত্ব শাসিত পৰিষদ বিধেয়ক'। উল্লেখ্য যে, বিধানসভাৰ পূৰ্বৰ অধিবেশনতে চৰকাৰে বিধেয়কখন বিধানসভাত উত্থাপন কৰাৰ কথা আছিল যদিও কেতবোৰ কাৰিকৰী কাৰণত সেয়া সম্ভৱ হৈ উঠা নাছিল । গতিকে, শীতকালীন অধিবেশনৰ প্ৰথম দিনাই বিধেয়কখন সদনত উত্থাপন কৰা হয় আৰু অধিবেশনৰ অন্তিম দিনা বিধানসভাত গৃহীত হয় বিধেয়কখন ।
ইফালে, বিধেয়কখন সদনত গৃহীত হোৱাৰ পিচত ৰাজ্যৰ ভৈয়াম জনজাতি উন্নয়ন দপ্তৰৰ মন্ত্ৰী চন্দন ব্ৰহ্মই বুধবাৰৰ দিনটোক এক ঐতিহাসিক দিন বুলি অভিহিত কৰে । সংবাদ মাধ্যমৰ আগত তেওঁ কয় যে, ৰাজ্যৰ ষষ্ঠ অনুসূচীভূৰ্ক্ত তিনিখন স্বায়ত্ব শাসিত পৰিষদ ক্ৰমে বিটিচি, ডিমা হাচাও আৰু কাৰ্বি আংলং স্বায়ত্ব শাসিত পৰিষদৰ সীমাৰ বাহিৰত বসবাস কৰা বড়ো-কছাৰী লোক সকলক সামৰি গঠন কৰা হ'ব নতুন স্বায়ত্ব শাসিত পৰিষদ ।