গুৱাহাটী, 9 ছেপ্টেম্বৰ : কংগ্ৰেছ আৰু এ আই ইউ ডি এফৰ মিত্ৰতাৰ ফলত আটাইতকৈ বেছিকৈ লাভৱান হ'ব বিজেপি । এই মিত্ৰতাৰ ফলত উজনি অসমত কংগ্ৰেছৰ দখলত থকা আটাইকেইটা সমষ্টিয়েই অতিৰিক্তভাৱে লাভ কৰিব বিজেপিয়ে । এই দাবী অসম প্ৰদেশ বিজেপিৰ ।
কংগ্ৰেছ এ আই ইউ ডি এফৰ মিত্ৰতাত লাভৱান হ'ব শাসকীয় দলঃ বিজেপি যিসময়ত প্ৰদেশ কংগ্ৰেছৰ সভাপতি ৰিপুণ বৰাই বাৰম্বাৰ দাবী কৰি আহিছে যে,এ আই ইউ ডি এফ আৰু কংগ্ৰেছৰ মিত্ৰতাই বিজেপিক ধুলিসাৎ কৰি দিব, সেই সময়তে বিজেপিয়ে উজনি অসমত কংগ্ৰেছৰ দখলত থকা 6 টা সমষ্টি আজুৰি আনিবলৈ ককালত টঙালি বন্ধা পৰিলক্ষিত হৈছে ।
উল্লেখ্য যে, উজনি অসমৰ তিতাবৰ,গোলাঘাট,মৰিয়নি,সৰুপথাৰ,ডুমডুমা আৰু নাজিৰা সমষ্টি আছে কংগ্ৰেছৰ দখলত । কিন্তু উজনিত এ আই ইউ ডি এফৰে কংগ্ৰেছে মিত্ৰতা কৰা বিষয়টো কংগ্ৰেছৰ গৰিষ্ঠ সংখ্যক সমৰ্থক বা ভোটাৰে সহজভাৱে গ্ৰহণ কৰা নাই । যাৰ পূৰ্ণ সুযোগ ল'ব বিচাৰিছে বিজেপিয়ে । প্ৰদেশ বিজেপিৰ ৰাজ্যিক উপ-সভাপতি জয়ন্ত দাসেও বুধবাৰে ইটিভি ভাৰতৰ আগত অনুৰূপ মন্তব্য কৰি কয় যে,এই মিত্ৰতাই উজনিত কংগ্ৰেছৰ হাতত থকা সমষ্টি কেইটা বিজেপিৰ দখললৈ অহাটো নিশ্চিত কৰিলে । আনকি,এই মিত্ৰতাৰ বাবেই তৰুণ গগৈ,অজন্তা নেওগ,দেৱব্ৰত শইকীয়া আদিৰ দৰে নেতাসকলেও আগন্তক নিৰ্বাচনত সমষ্টি হেৰুৱাব লাগিব বুলি মন্তব্য প্ৰদান কৰে ৷
লগতে পঢ়ক : শিশু নিৰ্যাতনত অভিযুক্ত মৰাণ মহাবিদ্যালয়ৰ অধ্যক্ষা মিতালী কোঁৱৰক নিলম্বন
