মহানগৰীত থলুৱা খাদ্যৰ সোৱাদ দিয়াৰ চেষ্টা যুৱকৰ

ভূৰুকা-এজন উচ্চ শিক্ষিত যুৱকৰ চাহৰ বিপণী ৷ বিপণীখনত উপলব্ধ বিভিন্ন সোৱাদৰ চাহৰ লগতে থলুৱা পিঠা-পনাসমূহ ৷ মহানগৰীৰ চান্দমাৰীত অৱস্থিত এই চাহৰ বিপণী ৷

গুৱাহাটী,28 ডিচেম্বৰ: মহানগৰীত বিভিন্ন সোৱাদৰ চাহৰ সৈতে অসমীয়া পিঠা-পনাৰ জুতি দিবলৈ প্ৰয়াস কৰিছে এজন উচ্চ শিক্ষিত যুৱকে । বিদ্যুৎ কলিতা নামৰ যুৱকজনে প্ৰায় এবছৰ পূৰ্বে মহানগৰীৰ চান্দমাৰীত আৰম্ভ কৰিছিল ভূৰুকা নামৰ এখন চাহৰ বিপণী । য’ত বৰ্তমান উপলব্ধ ভিন্ন সোৱাদৰ 18 প্ৰকাৰৰ চাহ ৷

ভূৰুকা অসমীয়াৰ প্ৰাণ বিহুৰ প্ৰথম আখৰ আৰু অসম নামৰ সংযুক্তৰে গঢ় লৈ উঠা এখন চাহৰ বিপণী । মঙলদৈৰ দিপীলাৰ বিদ্যুৎ কলিতা নামৰ যুৱকজনে গুৱাহাটী বিশ্ববিদ্যালয়ৰ পৰা ৰাজনীতি বিজ্ঞানত স্নাতকোত্তৰ ডিগ্ৰী গ্ৰহণ কৰি মহানগৰীৰ চান্দমাৰীত আৰম্ভ কৰিছে এই চাহৰ বিপণী । বিগত বৰ্ষৰ ডিচেম্বৰ মাহত স্থাপন কৰা এই চাহৰ বিপণীয়ে ইতিমধ্যে এটা বছৰ পূৰ্ণ কৰে । এই ভূৰুকাত বৰ্তমান উপলব্ধ চাহৰ লগতে অসমৰ থলুৱা প্ৰতিটো পিঠা, জলপান, লাড়ু আদি ৷ যাৰ বাবে ভূৰুকা এতিয়া জনপ্ৰিয় হৈ পৰিছে সকলোৰে মাজত ।

গাখীৰৰ চাহৰ পৰা তুলসী চাহলৈ, খলা চাপৰি পিঠাৰ পৰা সান্দহলৈকে সকলো উপলব্ধ ভূৰুকালৈ প্ৰতিদিনেই আহে বহু চাহ প্ৰিয় গ্ৰাহক । বিদ্যুতৰ ভূৰুকা এতিয়া বহুতৰ বাবে হৈ পৰিছে আড্ডাস্থলী । হাতত একাপ গৰম চাহ লৈ ভূৰুকাত সোৱাদ ল’ব পাৰি ভিন্নৰসৰ গ্ৰন্থৰো । উচ্চ শিক্ষিত হোৱাৰ পিছত চাকৰিৰ প্ৰতি আসক্ত নহৈ এইদৰে ব্যৱসায় কৰিও সুন্দৰকৈ চলিব পাৰে বুলি মন্তব্য কৰে ভুৰুকাৰ স্বত্বাধিকাৰী বিদ্যুতে ৷

লগতে চাওকঃবিৰোধী দলপতিৰ স্বীকৃতি হেৰুৱালে দেৱব্ৰত শইকীয়াই