বাইহাটা, 4 চেপ্তম্বৰঃ প্লাষ্টিকৰ মাত্ৰাধিক ব্যৱহাৰে সমগ্ৰ বিশ্বতে পৰিবেশৰ প্ৰতি ভাবুকি অনাৰ সময়তে বাইহাটা চাৰিআলিৰ নিকটৱৰ্তী বাৰেডলা গাৱত দেখা গ'ল কিছু ব্যতিক্ৰমী চিন্তা ৷ উক্ত অঞ্চলটোত অনুষ্ঠিত হ'ল এক 15 দিনীয়া কৰ্মশালা,য'ত প্ৰশিক্ষণ দিয়া হ'ল বাঁহেৰে নিত্য-প্ৰয়োজনীয় সামগ্ৰী নিৰ্মাণ সম্পৰ্কে ৷
গাঁও খনৰ প্ৰতিটো পৰিয়ালে প্লাষ্টিকক প্ৰত্যাহ্বান জনাই নিৰ্মাণ কৰি আহিছে বাঁহৰ খাছা । যি খাছাৰ জৰিয়তে মূৰ্গী পোৱালীৰ যোগান ধৰা উদ্যোগ সমূহে দৈনিক সৰবৰাহ কৰে মূৰ্গীৰ পোৱালী । বহু বছৰৰ পৰা এই গাঁও খনত নিৰ্মাণ কৰা খাছা ক্ৰয় কৰি বিভিন্ন মূৰ্গী পোৱালীৰ উদ্যোগ সমূহে সৰবৰাহ কৰি আহিছে ব্ৰইলাৰ মূৰ্গীৰ পোৱালী । যাৰ ফলশ্ৰুতিত গাঁওখন পৰিণত হৈছে বাঁহ শিল্পৰ এক উদ্যোগলৈ । যদিহে ২ অক্টোবৰৰ পৰা প্লাষ্টিক জাতীয় সামগ্ৰী বন্ধ হয় তেনেহলে এই বাঁহৰ খাছাৰ চাহিদা আৰু বৃদ্ধি হ'ব বুলি আশাবাদী বাৰেডলা গাঁৱৰ ৰাইজ ।