নিউজ ডেস্ক,30 নৱেম্বৰ : অসমৰ এক নতুন প্ৰস্তাৱিত ৰাষ্ট্ৰীয় উদ্যান ফিপছ’ বন্যপ্ৰাণী অভয়াৰণ্য আৰু জিংগমে চিংগী ৱাংচুক ৰাষ্ট্ৰীয় উদ্যানৰ সমীপত অৱস্থিত, যিয়ে সীমান্তত এক দৃশ্যপটৰ সৃষ্টি কৰিব ৷ শনিবাৰে বনমন্ত্ৰী পৰিমল শুক্লবৈদ্য়ই টুইটযোগে কয় যে, ৰাজ্য চৰকাৰে ৰাজ্যৰ ষষ্ঠখন ৰাষ্ট্ৰীয় উদ্যানৰ বাবে ‘ৰায়মোনা ৰাষ্ট্ৰীয় উদ্যান’ৰ প্ৰস্তাৱটো গ্ৰহণৰ প্ৰক্ৰিয়া আৰম্ভ কৰিছে ৷ তেওঁ ইতিমধ্যে মানাহ ৰাষ্ট্ৰীয় উদ্যানত এই নতুন প্ৰস্তাৱিত ৰাষ্ট্ৰীয় উদ্য়ানখনৰ ভৌগলিক আৰ্হি প্ৰস্তুত কৰিছে ৷
ৰাজ্য়ত ইতিমধ্যে কাজিৰঙা, মানাহ, ডিব্ৰু-চৈখোৱা, ওৰাং আৰু নামেৰী পাঁচখন ৰাষ্ট্ৰীয় উদ্যান আছে ৷ প্ৰস্তাৱিত নতুন ৰায়মোনা ৰাষ্ট্ৰীয় উদ্য়ানখন ৰিপু সংৰক্ষিত বনাঞ্চলৰ উত্তৰাঞ্চলৰ 508.62 বৰ্গ কিলোমিটাৰ আগুৰি আছে ৷ লগতে এই ৰাষ্ট্ৰীয় উদ্য়ানখন হিমালয়ৰ দক্ষিণ প্ৰান্তত আৰু মানাহ ব্যাঘ্ৰ প্ৰকল্পৰ পশ্চিমাংশক সংলগ্ন কৰিছে ৷ বড়োলেণ্ড স্বায়ত্ব শাসিত পৰিষদৰ কোকৰাঝাৰ জিলাত আনুষ্ঠানিভাৱে মুকলি হ’ব এই ৰাষ্ট্ৰীয় উদ্য়ানখন ৷
প্ৰস্তাৱিত ৰায়মোনা ৰাষ্ট্ৰীয় উদ্য়ান পশ্চিমবংগ আৰু অসমৰ আন্তঃৰাজ্য়িক সীমাৰ সৈতে পশ্চিমবংগৰ সোণকোষ নদী, ভাৰত-ভূটান আন্তঃৰাষ্ট্ৰীয় সীমাৰ উত্তৰাংশ আৰু ৰিপু সংৰক্ষিত বনাঞ্চলৰ দক্ষিণাংশক সংলগ্ন কৰিব ৷ বন বিষয়াই জনোৱা মতে, ঐতিহাসিকভাৱে এই অঞ্চল হিমালয় পৰ্বত, ইন্দো-মালয়, ভাৰত-চীনৰ পশ্চিমাংশ আৰু পূৱলৈ উপনিৱেশ ভাৰতৰ ৰাজত্বৰ এক অংশ আছিল ৷