গুৱাহাটী, 27 মাৰ্চ: অসমীয়া জাতিৰ স্বাভিমান গামোচাক বঙালী গামোচাৰ সৈতে সংলগ্ন কৰি সমন্বয়ৰ বাৰ্তা দিবলৈ গৈ চৰকাৰী পৃষ্ঠপোষকতাত গামোচাক বিকৃত কৰাক লৈ ৰাজ্যজুৰি অব্যাহত আছে প্ৰতিক্ৰিয়া আৰু বিতৰ্ক ৷ এই কাৰ্যক একেমুখে ধিক্কাৰ দিছে সকলোৱে (Assamese Gamosa controversy) ৷
শেহতীয়া এই গামোচা বিতৰ্ক সন্দৰ্ভত প্ৰতিক্ৰিয়া প্ৰকাশ কৰিছে অসম তৃণমূল কংগ্ৰেছৰ সভাপতি ৰিপুন বৰাই ৷ তৃণমূল কংগ্ৰেছৰ গুৱাহাটীস্থিত মুখ্য কাৰ্যালয়ত অনুষ্ঠিত এক সংবাদমেলত ৰিপুন বৰাই এই কাৰ্যৰ বিৰোধিতা কৰি ৰাজ্যৰ মূল সমস্যাসমূহৰ পৰা জনতাৰ মনোযোগ ব্যাহত কৰাৰ বাবে বিজেপিয়ে ষড়যন্ত্ৰ কৰা বুলি অভিযোগ উত্থাপন কৰে ৷ অসমীয়াৰ স্বাভিমানৰ গামোচাখনৰ এচোৱা কাটি বঙালীসকলৰ গামোচাখনৰে আনচোৱা একেলগ কৰাটো চূড়ান্ত অপমানজনক বুলি মন্তব্য কৰে ৰিপুন বৰাই (Ripun Bora on Gamosa controversy) ৷
উল্লেখ্য যে, গুৱাহাটীৰ মালিগাঁৱত অনুষ্ঠিত হোৱা এক অনুষ্ঠানত মন্ত্ৰী বিমল বড়া আৰু ডাঃ ৰণোজ পেগুক আদৰণি জনোৱা হৈছিল এখন বিকৃত গামোচাৰে ৷ এই সন্দৰ্ভত প্ৰতিক্ৰিয়া প্ৰকাশ কৰি শিক্ষামন্ত্ৰী ৰণোজ পেগুৱে এয়া সম্প্ৰীতিৰ নিদৰ্শন বুলি কোৱা কথাও অগ্ৰহণযোগ্য বুলি মন্তব্য কৰে ৰিপুন বৰাই ৷ দুটা জাতিৰ গামোচা কাটি একেলগ কৰিলেহে সম্প্ৰীতি হয় নেকি বুলিও প্ৰশ্ন উত্থাপন কৰে ৰিপুন বৰাই (Assam TMC reacts to Gamosa controversy)