গুৱাহাটী, ২৫ ডিচেম্বৰ : সোমবাৰে জয়ানগৰস্থিত অসম তৃণমূল কংগ্ৰেছৰ মুখ্য কাৰ্যালয়ত এক সংবাদমেল সম্বোধন কৰে অসম তৃণমূল কংগ্ৰেছৰ সভাপতি ৰিপুণ বৰাই । নিষিদ্ধঘোষিত আলফাত যোগদান কৰিবলৈ যোৱাৰ সন্দেহত চাৰিজন যুৱকক আৰক্ষীয়ে গুলীয়াই হত্যাৰ যি চেষ্টা কৰিছিল, সেই সন্দৰ্ভত সৰৱ হয় ৰিপুণ বৰা । ৰিপুণ বৰাই এই ঘটনাৰ প্ৰতিক্ৰিয়া ব্যক্ত কৰি কয় যে নিষিদ্ধঘোষিত আলফাত যোগদান কৰিবলৈ যোৱা কাৰ্যক অসম তৃণমূল কংগ্ৰেছে কোনো কাৰণতে সমৰ্থন নকৰে । কিন্তু অসমীয়া যুৱকক কুকুৰ-মেকুৰীৰ দৰে ব্যৱহাৰ কৰা কাৰ্যকো কোনোপধ্যেই মানি ল'ব নোৱাৰে বুলি তেওঁ কয় ।
তেওঁ কয়, "এফালে মুখ্যমন্ত্ৰীয়ে মন্তব্য কৰে যে আৰক্ষী জনসাধাৰণৰ বন্ধু হ'ব লাগে, আনফালে আকৌ তেওঁৰ দ্বাৰা নিয়ন্ত্ৰিত আৰক্ষীয়ে অসমীয়া যুৱকক গুলীয়াই হত্যা কৰাৰ চেষ্টা কৰে ।" আলফাত যোগদান কৰিবলৈ যোৱাৰ সন্দেহত শদিয়াত বিশ্বজিৎ বৰগোঁহাই, মনোজ বৰগোঁহাই, দ্বীপজ্যোতি নেওগ আৰু শিৱসাগৰৰ পল্লৱজ্যোতি গগৈক আৰক্ষীয়ে গুলীয়াই হত্যাৰ চেষ্টা কৰা কাৰ্যক তৃণমূল কংগ্ৰেছে তীব্ৰ ভাষাৰে গৰিহণা দিয়ে ।
ৰিপুণ বৰাই মুখ্যমন্ত্ৰী হিমন্ত বিশ্ব শৰ্মাক প্ৰশ্ন কৰি কয়, "আজিৰ অসমীয়া নৱপ্ৰজন্মই আলফালৈ যাবলগীয়া কিয় হৈছে ? ক্ষোভিত অসমীয়া যুৱকৰ মনৰ ক্ষোভবোৰ মষিমূৰ কৰিবৰ বাবেই চৰকাৰে এনে ধৰণৰ এনকাউণ্টাৰ ব্যৱস্থা প্ৰৱৰ্তন কৰিছে নেকি ? শদিয়াৰ বিশ্বজিৎ বৰগোঁহাই, মনোজ বৰগোঁহাই, দ্বীপজ্যোতি নেওগ পৰিবহণ নিগমৰ পৰা চাটাই কৰা কৰ্মচাৰী আছিল । আমি সকলোৱে জানো এটা চাকৰি থকাৰ পিছত হঠাৎ যদি তেওঁলোকে চাকৰি হেৰুৱায়, তেন্তে এজন ব্যক্তিয়ে মানসিকভাৱে কি পৰিস্থিতিৰ সন্মুখীন হয় ।"
তেওঁ লগতে মুখ্যমন্ত্ৰীক প্ৰশ্ন কৰে, "অসম চৰকাৰে কেতিয়াবা অসমীয়া যুৱক-যুৱতীৰ মনৰ উমান ল'বলৈ চেষ্টা কৰিছেনে ? এখন নিৰ্বাচিত চৰকাৰে জনসাধাৰণৰ অভিভাৱক হ'বলৈ চেষ্টা কৰিব লাগে । এনকাউণ্টাৰ ব্যৱস্থা দায়িত্বশীল অভিভাৱকৰ ধৰ্ম কেতিয়াও হ'ব নোৱাৰে । আৰক্ষীয়ে তিনিওজন যুৱককে সুস্থভাৱে আটক কৰিব পাৰিলেহেঁতেন । কিন্তু তাকে নকৰি এনকাউণ্টাৰ কিয় কৰিবলগীয়া হ'ল ?"