গুৱাহাটী,২৬ অক্টোবৰ: হাজাৰ হাজাৰ কোটি টকা ঋণ লৈ কেৱল হিতাধিকাৰী সৃষ্টিৰে ভোটবেংক টনকিয়াল কৰাত ব্যস্ত বিজেপি চৰকাৰে অসমখনক সৰ্বস্তৰতে ঠগ-প্ৰৱঞ্চনাৰে ধ্বংসৰ মুখলৈ ঠেলি দিয়াৰ বিষয়টো এতিয়া আৰু লুকাই থকা নাই- এই বক্তব্য প্ৰদেশ কংগ্ৰেছৰ । বুধবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি প্ৰদেশ কংগ্ৰেছৰ মিডিয়া বিভাগৰ অধ্যক্ষ মনজিৎ মহন্তই কয় যে ৰাজ্য চৰকাৰৰ অৰ্থনৈতিক অৱস্থা যে লাওলোৱা সেই কথা লাহে লাহে পোহৰলৈ আহিছে(Assam pradesh congress committe) । ৰাজ্য চৰকাৰক কঠোৰ ভাষাৰে সমালোচনা কৰি তেওঁ কয় যে ৰাজ্য চৰকাৰৰ ওফাইডাং মৰা নীতিৰ পৰিণতিত অসমৰ ৩৩৭ খন প্ৰাদেশীকৃত মহাবিদ্যালয় ঘোৰ অৰ্থিক সংকটত ভুগিছে(APCC criticizes BJP) ।
বছৰি ৫ লাখ টকাতকৈ কম আয়ৰ পৰিয়ালৰ শিক্ষার্থীক বিনামূলীয়াকৈ নামভৰ্তিকৰণৰ সুবিধা দি সেই ধন ৰাজ্য চৰকাৰে মহাবিদ্যালয়সমূহক ক্ষতিপূৰণ হিচাপে পৰিশোধ কৰিব বুলি দিয়া ভুৱা চৰকাৰী আশ্বাসৰ পৰিণতিত এতিয়া অর্থনৈতিক নাটনিৰ পৰিপ্ৰেক্ষিতত স্থবিৰতা নামি আহিছে ৩৩৭ খন মহাবিদ্যালয়লৈ । মহাবিদ্যালয় কর্তৃপক্ষসমূহে সকলো তথ্য-পাতি চৰকাৰে বিচৰা মতেই জমা দিয়াৰ পিছতো ২০২১-২২ বৰ্ষৰ প্ৰাপ্য ক্ষতিপূৰণৰ ধনৰ মাত্ৰ ৪৮ শতাংশ ধন চৰকাৰে মহাবিদ্যালয়সমূহক এই পর্যন্ত ঘূৰাই দিব পাৰিছে । বাকী ৫২ শতাংশ ধন কেতিয়া মহাবিদ্যালয়সমূহে লাভ কৰিব তাৰো কোনো নিশ্চয়তা দিব পৰা নাই ৰাজ্য চৰকাৰে ।
আনহাতে ২০২১-২২ ৰ ৫২ শতাংশ বকেয়া থকাৰ সময়ত মহাবিদ্যালয়সমূহত পুনৰ ২০২২-২৩ বৰ্ষৰ নামভৰ্তিকৰণ ইতিমধ্যে সম্পূৰ্ণ হৈছে । তাৰ বিস্তৃত তথ্য-পাতিও মহাবিদ্যালয়সমূহে ইতিমধ্যে জমা দিছে । কিন্তু তাৰ এপইচাও এই পর্যন্ত ৰাজ্য চৰকাৰে মহাবিদ্যালয়সমূহক ঘূৰাই দিব পৰা নাই । উল্লেখ্য যে নামভৰ্তিৰ মাচুলৰ বাবদ প্ৰতিখন মহাবিদ্যালয়ে গড়ে ১০ লাখ টকাৰ পৰা ৩৫-৪০ লাখ টকা সংগ্ৰহ কৰিছিল আৰু তাৰে শিক্ষাৰ্থীৰ বাবদ বিশ্ববিদ্যালয়ক দিবলগীয়া মাচুল, পুথিভঁড়ালৰ বাবে কিতাপ ক্ৰয়, মহাবিদ্যালয়ৰ বিদ্যুতৰ বিল পৰিশোধ কৰা আদি ব্যয়সমূহ পূৰণ কৰিছিল । কিন্তু বৰ্ত্তমানৰ পৰিস্থিতিত অসমৰ বহু মহাবিদ্যালয়ে অর্থ-সংকটৰ পৰিণতিত বহু মাহ ধৰি বিদ্যুতৰ বিল পৰিশোধ কৰিব পৰা নাই(Crisis in Higher education sector in Assam) ।
নতুন শিক্ষানীতি কাৰ্যকৰীকৰণৰ ক্ষেত্ৰতো মহাবিদ্যালয়সমূহক পর্যাপ্ত পৰিমাণৰ ধনৰ প্ৰয়োজন হৈছে । কিন্তু পুঁজিৰ অভাৱত মহাবিদ্যালয়সমূহে সেইবোৰ কাৰ্যকৰণৰ ক্ষেত্ৰত কিঞ্চিতো আগবাঢ়িব পৰা নাই । অসমৰ বহু মহাবিদ্যালয়ত বিভিন্ন বিষয়ত ‘অস্থায়ী’ বা ‘ঠিকাভিত্তিক' আৰু 'অতিথি' শিক্ষকক শিক্ষণৰ বাবে আমন্ত্ৰণ কৰা হয় । কিন্তু ধনৰ অভাৱত বৰ্তমান সেই প্ৰক্ৰিয়া একপ্ৰকাৰ বন্ধ হৈ পৰিছে আৰু তেনে শিক্ষকসকলেও লাহে লাহে ব্যক্তিগত খণ্ডৰ মহাবিদ্যালয়লৈ ঢাপলি মেলিবলৈ বাধ্য হৈ পৰিছে(Higher education sector in Assam) ।