গুৱাহাটী, ৭ ডিচেম্বৰ :ঘোষণা কৰা হ’ল উচ্চতৰ মাধ্যমিকৰ চূড়ান্ত পৰীক্ষাৰ সময়সূচী । ২০২৪ বৰ্ষৰ ১২ ফেব্ৰুৱাৰীৰ পৰা উচ্চতৰ মাধ্যমিকৰ চূড়ান্ত বৰ্ষৰ পৰীক্ষা অনুষ্ঠিত হ’ব । উক্ত পৰীক্ষা ১৩ মাৰ্চত অন্ত পৰিব ।
দুয়োবেলা অনুষ্ঠিত হ'বলগীয়া উক্ত পৰীক্ষাৰ আগবেলাৰ পৰীক্ষা পুৱা ৯ বজাৰ পৰা ১২ বজালৈ অনুষ্ঠিত হ'ব, আনহাতে পিছবেলাৰ পৰীক্ষা হ'ব ১:৩০ বজাৰ পৰা ৪:৩০ বজালৈ । ইয়াৰোপৰি ব্যৱহাৰিক পৰীক্ষা অনুষ্ঠিত হ'ব ২৪ জানুৱাৰীৰ পৰা ৮ ফেব্ৰুৱাৰীলৈ ।
১২ ফেব্ৰুৱাৰীত অনুষ্ঠিত হ’ব তিনিওটা শাখাৰ অৰ্থাৎ কলা, বিজ্ঞান আৰু বাণিজ্য শাখাৰ ইংৰাজীৰ পৰীক্ষা । সংগীত বিষয়ৰ তিনিওটা শাখাৰ পৰীক্ষা অনুষ্ঠিত হ'ব অহা ১৩, ১৭ আৰু ২৩ ফেব্ৰুৱাৰীত । ১৩ ফেব্ৰুৱাৰীত অনুষ্ঠিত হ'ব বিহু বিষয়ৰ পৰীক্ষা । ১৬ ফেব্ৰুৱাৰীত অনুষ্ঠিত হ'ব ৰাজনীতি বিজ্ঞান, বিজনেছ ষ্টাডী আৰু ৰসায়ন বিজ্ঞানৰ পৰীক্ষা ৷ বৃত্তিমূলক বিষয়ৰ পৰীক্ষা অনুষ্ঠিত হ'ব ১৭ ফেব্ৰুৱাৰী, ৫ মাৰ্চ আৰু ৯ মাৰ্চত ।