গুৱাহাটী, 1 এপ্ৰিলঃ নিৰ্বাচনৰ বাবে সমগ্ৰ ৰাজ্যতে কটকটীয়া কৰা হৈছে নিৰাপত্তা ব্যৱস্থা। নিৰাপত্তাৰ ক্ষেত্ৰত উত্তৰ পূৱৰ আৰক্ষী শীৰ্ষ বিষয়াসকলৰ লগত যোগাযোগত আছে অসম আৰক্ষী। আনহাতে চ'ছিয়েল মিডিয়াটো তীক্ষ্ন নজৰ দিছে অসম আৰক্ষীয়ে। নিৰ্বাচন সন্দৰ্ভত সোমবাৰে আৰক্ষী সঞ্চালক প্ৰধান কুলধৰ শইকীয়াই মহানগৰীৰ উলুবাৰীস্থিত অসম আৰক্ষীৰ মুখ্য কাৰ্যালয়ত এখন সংবাদমেলৰ সম্বোধন কৰি সংবাদিকক এই তথ্য প্ৰদান কৰে ।
নিৰ্বাচন সন্দৰ্ভত আৰক্ষী সঞ্চালক প্ৰধান কুলধৰ শইকীয়াৰ সংবাদমেল
লোকসভা নিৰ্বাচন শান্তিপূৰ্ণভাৱে অনুষ্ঠিত কৰিবলৈ আৰক্ষীয়ে যথোপযুক্ত ব্যৱস্থা গ্ৰহণ কৰা বুলি জানিবলৈ দিয়ে । নিৰ্বাচনৰ সময়ত যাতে কোনো ধৰণৰ অপ্ৰীতিকৰ ঘটনা সংঘটিত নহয় তাৰ বাবে ৰাজ্যৰ 90 টা নিৰাপত্তা কোম্পানীৰ উপৰিও বহিৰাজ্যৰ 30 টাকৈ কোম্পানীক নিয়োগ কৰা হৈছে। এন আৰ চিৰ বাবে নিয়োগ কৰা নিৰাপত্তাৰক্ষীক নিৰ্বাচনত দায়িত্ব দিয়া নহয়৷