Enact law to stop polygamy : বহুবিবাহ বাল্যবিবাহ নিষিদ্ধকৰণ আইনৰ খচৰা প্ৰস্তুত কৰিবলৈ ৫ জনীয়া কমিটি গঠন

বহুগামী বিবাহৰ বিৰুদ্ধে আহিব আইন ৷ মহাধিবক্তা দেৱজিৎ লন শইকীয়াৰ নেতৃত্বত খচৰা প্ৰস্তুতৰ বাবে ৫ জনীয়া কমিটী গঠন ৷ সূচনা জাৰি কৰা তাৰিখৰ পৰা ৪৫ দিনৰ ভিতৰত চৰকাৰক দাখিল কৰিব কমিটীয়ে আইনৰ খচৰা ৷

গুৱাহাটী, ১৪ ছেপ্টেম্বৰ :বহুবিবাহ, বাল্যবিবাহ নিষিদ্ধকৰণ আৰু ভুৱা পৰিচয়েৰে বিবাহ প্ৰতিৰোধৰ দিশত আইন প্ৰৱৰ্তনৰ বাবে আৰু এখোজ আগবাঢ়িছে অসম চৰকাৰ ৷ বহুবিবাহ, বাল্যবিবাহ আৰু ভুৱা পৰিচয়েৰে আন্তঃধৰ্মীয় বিবাহৰ প্ৰতিৰোধ কৰা, বাল্য বিবাহৰ বিষয়ত কাজীৰ ভূমিকা আদি বিষয়ত এখন উপযুক্ত আইন প্ৰণয়নৰ বাবে অসম চৰকাৰে এজন ৫ জনীয়া কমিটী গঠন কৰিছে ।

বহুবিবাহ বন্ধৰ আইন প্ৰণয়নৰ বাবে চৰকাৰে গঠন কৰিলে বিশেষজ্ঞ সমিতি

ৰাজ্যৰ মহাধিবক্তা দেৱজিৎ লন শইকীয়াৰ অধ্যক্ষতাত কমিতিখন গঠন কৰা হৈছে ৷ ৰাজ্যৰ ৰাজ্যপাল গোলাপচান্দ কাটাৰীয়াৰ নিৰ্দেশনা মৰ্মে ৰাজ্য চৰকাৰে গঠন কৰিছে এই কমিটীখন ৷ বুধবাৰে জাননী জাৰি কৰি গঠন কৰা কমিতিৰ আন সদস্য ৪ গৰাকী হ’ল, অসমৰ আৰক্ষী সঞ্চালক প্ৰধান জি পি সিং, জ্যেষ্ঠ অতিৰিক্ত মহাধিবক্তা নলীন কোহলী, আইনী স্মৃতিচাৰক আৰু ন্যায়িক বিভাগৰ সচিব ৰমেন বৰুৱাৰ লগতে গৃহ আৰু ৰাজনৈতিক বিভাগৰ সচিব বিশ্বজিৎ পেগু ।

গৃহ আৰু ৰাজনৈতিক বিভাগৰ বিশ্বজিৎ পেগুক কমিতিখনৰ সদস্য সম্পাদক হিচাবে দায়িত্ব ভাৰ দিয়া হৈছে । অসম চৰকাৰৰ ৰাজনৈতিক (ক) বিভাগে বুধবাৰে এক অধিসূচনা জাৰি কৰি এই গুৰুত্বপূৰ্ণ সমিতিখন গঠন কৰে । অধিসূচনা জাৰি কৰাৰ দিনটোৰ পৰা ৪৫ দিনৰ ভিতৰত কমিটীখনে নিজৰ আইনৰ খচৰা চৰকাৰৰ ওচৰত দাখিল কৰিব লাগিব ।

সদ্য গঠিত এই কমিটীয়ে বিভিন্নজনৰ পৰা লাভ কৰা পৰামৰ্শসমূহ বিবেচনা কৰিব ৷ যিসকলে আইনখনৰ বিৰোধিতা কৰে তেওঁলোক তিনিখন আবেদনৰ মাজেৰে যাব ৷ প্ৰয়োজন হ’লে এই কমিটীখনে ব্যক্তিগতভাৱেও আইনখন সমৰ্থন নকৰা সকলৰ যুক্তি শুনিব ৷ আইনখনৰ সমৰ্থন নকৰা সকলৰ মতামত গ্ৰহণ কৰি কমিটীখনে বিবেচনা কৰিব ৷ ইয়াৰ উপৰিও প্ৰয়োজন সাপেক্ষে কমিটীখনে আইন আয়োগৰ অধ্যক্ষকো সাক্ষাৎ কৰাৰ দিহা দিয়া হৈছে অতিৰিক্ত মুখ্য সচিব নিৰজ বাৰ্মা স্বাক্ষৰিত কমিটী গঠন কৰা জাননীখনত ।

উল্লেখযোগ্য যে, অসম চৰকাৰে অহা ডিচেম্বৰ মাহত অসম বিধানসভাৰ অধিৱেশনত বহুবিবাহ নিষিদ্ধ কৰাৰ বাবে এখন বিধেয়ক উত্থাপন কৰাৰ বাবে যাৱতীয় প্ৰস্তুতি চলাই আহিছে । তাৰে পৰিপ্ৰেক্ষিতত এই ৫ জনীয়া কমিটীখন গঠন কৰা হৈছে । ইয়াৰ পূৰ্বেও এই বিষয়ক আইনৰ খচৰা প্ৰস্তুতকৰণৰ বাবে অৱসৰপ্ৰাপ্ত ন্যায়াধীশ ৰুমী ফুকনৰ নেতৃত্বতো এখন কমিটী গঠন কৰা হৈছিল ।

লগতে পঢ়ক :Enact law to stop polygamy: বহুবিবাহ বন্ধৰ আইন প্ৰণয়নৰ বাবে চৰকাৰে গঠন কৰিলে বিশেষজ্ঞ সমিতি