গুৱাহাটী, ১০ ফেব্ৰুৱাৰী : সমগ্ৰ দেশৰ লগতে অসমতো চৰকাৰী কৰ্মচাৰী সমাজৰ অৱসৰৰ পিছৰ সময়ছোৱা সুৰক্ষাৰ স্বাৰ্থত পুৰণি পেঞ্চন ব্যৱস্থা পুনৰ প্ৰৱৰ্তনৰ নিৰন্তৰ দাবী উত্থাপন হৈ আহিছে (Assam govt employee demand OPS) । পুৰণি পেঞ্চন ব্যৱস্থাৰ দাবীত শুকুৰবাৰে কৰ্মবিৰতি পালন কৰে সদৌ অসম চৰকাৰী এনপিএছ কৰ্মচাৰীসকলে (strike for OPS in Assam) ৷ উল্লেখ্য, বিগত দিনত সদৌ অসম চৰকাৰী এনপিএছ কৰ্মচাৰী সংস্থাই পুৰণি পেঞ্চন ব্যৱস্থা প্ৰৱৰ্তনৰ দাবীত কেইবালানিও আন্দোলনৰ কাৰ্যসূচী হাতত লৈছিল (Assam NPS employee strike) ।
কিন্তু সিমানৰ পাছতো চৰকাৰৰ পৰা কোনো ধৰণৰ আশাব্যঞ্জক সঁহাৰি লাভ কৰা নাছিল । তাৰেই পৰিপ্ৰেক্ষিতত পুনৰবাৰ প্ৰতিবাদত নামে চৰকাৰী এনপিএছ (National Pension Scheme) শিক্ষক-কৰ্মচাৰী সমাজ । শুকুৰবাৰে সদৌ অসম চৰকাৰী এনপিএছ কৰ্মচাৰী সংস্থাৰ আহ্বানত ৰাজ্য চৰকাৰৰ শিক্ষক-কৰ্মচাৰী-শ্ৰমিক সমাজে 'কৰ্মবিৰতি' কাৰ্যসূচী পালন কৰি ৰাজ্যত এনপিএছ আঁচনিৰ বিলুপ্তি আৰু পুৰণি পেঞ্চন ব্যৱস্থাৰে (Old Pension Scheme) সকলো শ্ৰেণীৰ শিক্ষক-কৰ্মচাৰী সমাজৰ বৃদ্ধাৱস্থা সুৰক্ষিত কৰাৰ বাবে দাবী জনায় ৷
এই সন্দৰ্ভত সদৌ অসম চৰকাৰী এনপিএছ কৰ্মচাৰী সংস্থাৰ (all Assam govt NPS employee association) সভাপতি অচ্যুতানন্দ হাজৰিকাই কয় যে বিগত সময়ছোৱাত অসমৰ শিক্ষক-কৰ্মচাৰী সমাজে বাৰে বাৰে ৰাজ্য চৰকাৰক নিজৰ ভৱিষ্যতৰ শংকা নিৰ্মূলৰ বাবে দাবী জনাই অহাৰ পিছতো অসম চৰকাৰ নিৰ্বাক-নিৰ্বিকাৰ হৈ আছে । এক কথাত অসম চৰকাৰৰ হেমাহিৰ বাবেই আজি অসমৰ কৰ্মচাৰী সমাজে সংগ্ৰাম তীব্ৰতৰ কৰিবলৈ বাধ্য হৈছে ৷ অসমৰ কৰ্মচাৰী সমাজৰ সুৰক্ষাৰ ক্ষেত্ৰত কোনোদিনে আপোচ নকৰো বুলি উল্লেখ কৰি অচ্যুতানন্দ হাজৰিকাই কয়, এই সমস্যাৰ সমাধানৰ বাবে অনাগত দিনত আন্দোলনৰ কাৰ্যসূচী অধিক তীব্ৰতৰ কৰি তোলা হ'ব ।