গুৱাহাটী, 25 মাৰ্চ: দেশজুৰি বিশেষ চৰ্চা লাভ কৰা ‘দ্য কাশ্মীৰ ফাইলচ্’ নামৰ ছবিখনক কেন্দ্ৰ কৰি অসমতো সম্প্ৰতি ভিন্ন ক্ৰিয়া-প্ৰতিক্ৰিয়াৰ সৃষ্টি হৈছে (The Kashmir Files influence in Assam)। ৰাজ্যৰ শাসকীয় দল বিজেপিৰ মন্ত্ৰী, বিধায়কৰ পৰা আৰম্ভ কৰি বিজেপিৰ নেতা, কৰ্মকৰ্তাসকলৰ মাজত ছবিখনৰ প্ৰচাৰ কৰাৰ বাবে উঠিপৰি লগা দেখা গৈছে । স্বয়ং হিমন্ত বিশ্ব শৰ্মাই দলে বলে গুৱাহাটীৰ ছবিগৃহত ছবিখন উপভোগ কৰি ছবিখন চোৱাৰ বাবে ৰাজ্য চৰকাৰৰ কৰ্মচাৰীসকলৰ বাবে এদিনৰ অৰ্ধছুটিৰ ঘোষণা কৰিছে (Leave to Assam govt employees for watching The Kashmir Files)।
ইতিমধ্যে ৰাজ্য চৰকাৰে ছবিখন চোৱাৰ বাবে ৰাজ্যিক কৰ্মচাৰীসকলৰ বাবে এদিনৰ অৰ্ধছুটিৰ নিৰ্দেশনা জাৰি কৰিছে । ইপিনে অসম ৰাজ্যিক চলচ্চিত্ৰ(বিত্ত আৰু উন্নয়ন) নিগমে হিন্দী ভাষাৰ চলচ্চিত্ৰখনৰ প্ৰচাৰৰ বাবে নলবাৰীত বিনামূলীয়াকৈ ৰাইজৰ বাবে প্ৰদৰ্শনীৰ ব্যৱস্থা কৰিছে (Government employees are busy in publicity of The Kashmir files) । আন ঠাইতো ছবিখন প্ৰদৰ্শনীৰ বাব চলচ্চিত্ৰ নিগমে পৰিকল্পনা কৰিছে । চলচ্চিত্ৰ নিগমে বিশ্ব হিন্দু পৰিষদৰ সহযোগত এই প্ৰদৰ্শনীৰ ব্যৱস্থা কৰিছে । ইয়াকে লৈ হিন্দী ভাষাৰ ছবি এখনক চৰকাৰে এনেদৰে প্ৰচাৰ কৰাৰ পদক্ষেপক লৈ অসমীয়া ছবিজগতৰ প্ৰযোজক, পৰিচালক আৰু কলাকুশলীৰ মাজত ব্যাপক প্ৰতিক্ৰিয়াৰ সৃষ্টি হোৱা দেখা গৈছে (Assamese artists reaction on The Kashmir Files)।
লক্ষণীয় যে, এদিন পূৰ্বে গুৱাহাটী বিশ্ববিদ্যালয় কৰ্তৃপক্ষই বিশ্ববিদ্যালয়ৰ শিক্ষক, কৰ্মচাৰীসকলক ছবিখন চোৱাৰ বাবে এদিনৰ অৰ্ধছুটিৰ নিৰ্দেশনা জাৰি কৰিছে (Gauhati University announced leave to watch The Kashmir Files)। ইয়াকে কেন্দ্ৰ কৰি গুৱাহাটী বিশ্ববিদ্যালয়ত শিক্ষক কৰ্মচাৰী আৰু ছাত্ৰ-ছাত্ৰীসকলৰ মাজতো মিশ্ৰিত প্ৰতিক্ৰিয়াৰ সৃষ্টি হৈছে । উল্লেখ্য যে, বিবেক অগ্নিহোত্ৰীৰ দ্বাৰা পৰিচালিত দ্য কাশ্মীৰ ফাইলচ্ নামৰ ছবিখনে যোৱা 11 মাৰ্চত মুক্তি লাভ কৰিছিল । দেশজুৰি ছবিখনক লৈ যিমান প্ৰশংসা হৈছে সিমানেই বা তাতোকৈ অধিক বিতৰ্কও হোৱা দেখা গৈছে ।
ছবিখনক কেন্দ্ৰ কৰি দেশত সাম্প্ৰদায়িক মেৰুকৰণৰ সৃষ্টি হোৱা পৰিলক্ষিত হৈছে । অসমীয়া ছবি পৰিচালক উৎপল বৰপূজাৰীয়ে টুইটাৰৰ জৰিয়তে চলচ্চিত্ৰ নিগমৰ কৰ্তব্যৰ প্ৰতি প্ৰশ্ন কৰি হিন্দী ছবি এখন চলচ্চিত্ৰ নিগমে প্ৰচাৰৰ বাবে উঠিপৰি লগাৰ বাবে চলচ্চিত্ৰ নিগমক আওপকীয়াকৈ সমালোচনা কৰিছে । ইপিনে অসমীয়া ছবি পৰিচালক তথা অভিনেতা হিমাংশু প্ৰসাদ দাসে কয়- "হিন্দী চিনেমা এখন প্ৰচাৰ আৰু প্ৰসাৰ কৰাৰ বাবে চৰকাৰ আৰু চলচ্চিত্ৰ নিগমৰ টোপনি নোহোৱা হৈছে । চৰকাৰ আৰু চলচ্চিত্ৰ নিগমৰ অসমীয়া ছবিৰ ক্ষেত্ৰত এই উৎসাহ দেখুৱাওক । আব্দুল মজিদৰ দৰে ব্যক্তিৰ শেষ অসমীয়া ছবিখন প্ৰচাৰৰ বাবেও চলচ্চিত্ৰ নিগমে কোনো গুৰুত্ব নিদিলে । এই বেদনালৈ মানুহজনে এই পৃথিৱী এৰি গ'ল । চলচ্চিত্ৰ নিগমৰ এই ভূমিকাক মই গৰিহণা দিছো।"