নিউজ ডেস্ক, 8 জুন : ৰাজ্যত বছৰৰ প্ৰথমটো বানত দুখনকৈ জিলা ক্ৰমে- ধেমাজি আৰু লখিমপুৰৰ তিনিটা ৰাজহ চক্ৰৰ অন্তৰ্গত 36 খন গাঁও জলমগ্ন হৈ পৰিছে ৷
অসমৰ দুৰ্যোগ প্ৰশমন বিভাগৰ মতে, এই বানত দুয়োখন জিলাৰ 30,153 গৰাকী লোক প্ৰভাৱিত হৈছে ৷ তদুপৰি বাঢ়নি পানীত প্লাৱিত হৈছে 282.5 হেক্টৰ কৃষিভূমি ৷
এতিয়ালৈকে বানপীড়িত লোকৰ বাবে দুটা আশ্ৰয় শিবিৰ বিহপুৰীয়াত স্থাপন কৰি তাত বানত প্ৰভাৱিত লোকসকলক ৰখাৰ ব্যৱস্থা কৰা হৈছে ৷ ৰাজ্যৰ প্ৰথমটো বানৰ কৱলত পৰি এই পৰ্যন্ত কোনো লোকৰ মৃত্যুৰ খবৰ অহা নাই যদিও কৰ’ণা (Corona) মহামাৰীৰ এই সংকটৰ সময়ছোৱাত বানত প্ৰভাৱিত অঞ্চলৰ ৰাইজ যথেষ্ট সমস্যাৰ সন্মুখীন হ’বলগীয়া হৈছে ৷
ৰাজ্যৰ প্ৰথমটো বানত বিভিন্ন ঠাইত কিছু মথাউৰিও ক্ষতিগ্ৰস্ত হৈছে বুলি জানিব পৰা গৈছে ৷ তদুপৰি ডিমা হাচাও জিলাত বিগত 24 ঘণ্টাত হোৱা প্ৰৱল বৃষ্টিপাতৰ ফলত বিভিন্ন ঠাইত ভূমিস্খলনৰ ঘটনাও সংঘটিত হৈছে বুলি জানিবলৈ দিছে ৰাজ্যিক দুৰ্যোগ প্ৰশমন বিভাগে (Disaster Management Department) ৷
লগতে পঢ়ক: চপৰা চপৰে খহিছে দিহিঙৰ মথাউৰি