গুৱাহাটী, 14 জানুৱাৰী:গুৱাহাটীত চলি থকা খেল’ ইণ্ডিয়া য়ুথ গেমছ 2020 ত সোমবাৰে অসমৰ বাবে তৃতীয়টো সোণৰ পদক আহিল 4x100 মিটাৰ ৰিলে ৰেছত ৷ 4x100 মিটাৰ ৰিলে ৰেছৰ ল’ৰাৰ 21 অনুৰ্ধ্ব শাখাত শ্ৰেষ্ঠতাৰ খিতাপ অৰ্জন কৰিলে হুম মুছাহাৰী, সুবৰ্ণ কলিতা, পল্লৱ গগৈ আৰু ৰাজীৱ ব্ৰহ্মৰ দলটোৱে ।
সোণৰ পদক অৰ্জন কৰি ইটিভি ভাৰতৰ আগত দলটোৱে ব্যক্ত কৰিলে নিজৰ মনৰ অনুভৱ । এই সাফল্যৰ বাবে পৰিয়ালৰ লগতে প্ৰশিক্ষকক ধন্যবাদ দিয়ে দলটোৱে। লগতে দৰ্শকে উৎসাহ যোগোৱাৰ বাবেই এইয়া সম্ভৱ হৈ উঠিছে বুলি কয় অসমৰ দলটোৱে । আনহাতে ৰূপৰ পদকটো তামিল নাডুৰ হাৰেশ ৰাওৰ দলটোৰ লগতে ব্ৰঞ্জৰ পদক লাভ কৰে মহাৰাষ্ট্ৰৰ পি আছাৰেৰ দলটোৱে ।
ইপিনে সোমবাৰে খেল’ ইণ্ডিয়াৰ লগত সংগতি ৰাখি সৰুসজাইত অনুষ্ঠিত কৰা হয় এক বাৰেৰহণীয়া সাংস্কৃতিক অনুষ্ঠান । য’ত দেশৰ বিভিন্ন প্ৰান্তৰ কৃষ্টি সংস্কৃতি প্ৰদৰ্শন কৰা হয়। সোমবাৰৰ পৰা আৰম্ভ হোৱা এই সাংস্কৃতিক অনুষ্ঠানটো মুঠ তিনিদিনলৈ চলিব ৷
