গুৱাহাটী, ১৭ জুলাই:অসমৰ ৰাজনৈতিক ক্ষেত্ৰখনত শেহতীয়াকৈ মুখ্যমন্ত্ৰী ড৹ হিমন্ত বিশ্ব শৰ্মা আৰু এআইইউডিএফৰ নেতা মৌলানা বদৰুদ্দিন আজমলৰ 'অসমীয়া-মিঞা' প্রসংগই তুমুল বিতৰ্কৰ সৃষ্টি কৰিছে । এই বিষয়টোক লৈ চৰ্চা হৈ থকাৰ মাজতেই ইয়াৰ বিৰুদ্ধে সৰৱ হৈছে অসম চিভিল ছ'চাইটি । মুখ্যমন্ত্ৰী ড৹ হিমন্ত বিশ্ব শৰ্মা আৰু এআইইউডিএফৰ মুৰব্বী মৌলানা বদৰুদ্দিন আজমলে এই 'অসমীয়া-মিঞা' প্রসংগ উত্থাপনই কৰি দিয়া বক্তব্য অতি দুৰ্ভাগ্যজনক আৰু প্ৰৰোচনামূলক বুলি অভিহিত কৰি দুয়ো গৰাকীৰে বক্তব্যক অসম চিভিল ছ'চাইটিয়ে তীব্ৰ বিৰোধিতা কৰে ।
সোমবাৰে গুৱাহাটী প্ৰেছ ক্লাৱত এক সংবাদমেল সম্বোধন কৰি ছ'চাইটিৰ সভাপতি হাফিজ ৰছিদ আহমেদ চৌধুৰীয়ে কয়," প্রতিপক্ষৰ ভূমিকাত অৱতীৰ্ণ হৈ মৌলানা বদৰুদ্দিন আজমলে বিপৰীত দৃষ্টিকোণৰ পৰা গোঢ়া ধৰ্মীয় বক্তব্য আগবঢ়াই মুখ্যমন্ত্ৰীগৰাকীক সুবিধা প্ৰদান কৰি আহিছে । যিটো দুয়োগৰাকী ৰাজনীতিকৰ উগ্ৰ ধৰ্মান্ধতা আৰু ঠেক সাম্প্রদায়িক মনোবৃত্তিৰে চালিত স্বার্থান্ধ অভিসন্ধি । দুয়োগৰাকীৰে বক্তব্য গৰিহণাৰ যোগ্য ।" তেওঁ পুনৰ কয় ,"দেশৰ এক সাংবিধানিক উচ্চ-পদস্থ পদত অধিস্থিত এগৰাকী মুখ্যমন্ত্ৰীৰ ৰাজহুৱা বক্তব্যই সমাজত ঘৃণা, বিদ্বেষ, মনোমালিন্য তথা শত্রুতা বিয়পাই দুটা বা ততোধিক জনগোষ্ঠীৰ মাজত বিভাজন আৰু দ্বন্দ সৃষ্টি কৰাৰ ষড়যন্ত্ৰক আমি নিন্দা কৰিছো আৰু আইন বিৰোধী বুলি অভিহিত কৰিছো । "