গুৱাহাটী, ১৬ জুন :বাতিল কৰা হ’ল বাজেটত ঘোষণা কৰা এটা গুৰুত্বপূৰ্ণ সিদ্ধান্ত । ২০২৩-২৪ বৰ্ষৰ বাজেটত ৰাজ্যৰ আঠখন মহাবিদ্যালয়ক বিশ্ববিদ্যালয়লৈ উন্নিতকৰণৰ কৰাৰ ঘোষণা কৰা হৈছিল । কিন্তু সেই ঘোষণা বাতিল কৰা হ’ল । এতিয়া আৰু ৰাজ্যৰ আঠখন মহাবিদ্যালয়লক বিশ্ববিদ্যালয়লৈ উন্নিতকৰণ কৰা নহয় ।
২০২৩-২৪ বৰ্ষৰ বাজেটত বিত্তমন্ত্ৰী অজন্তা নেওগে ৰাজ্যৰ মুঠ ৮ খন ঐতিহ্যমণ্ডিত মহাবিদ্যালয়ক বিশ্ববিদ্যালয়লৈ উন্নীত কৰাৰ কথা ঘোষণা কৰিছিল । সেই মহাবিদ্যালয় কেইখন আছিল ক্ৰমে শিৱসাগৰ মহাবিদ্যালয়, কোকৰাঝাৰ চৰকাৰী মহাবিদ্যালয়, বঙাইগাঁও মহাবিদ্যালয়, যোৰহাটৰ জগন্নাথ বৰুৱা মহাবিদ্যালয়, উত্তৰ লখিমপুৰ মহাবিদ্যালয়, সন্দিকৈ ছোৱালী মহাবিদ্যালয়, নগাঁও মহাবিদ্যালয় আৰু শিলচৰৰ গুৰুচৰণ মহাবিদ্যালয় ।
বাজেট দাখিলৰ সময়ছোৱাত বিত্তমন্ত্ৰীৰ এই ঘোষণাই ৰাজ্যত মিশ্ৰিত প্ৰতিক্ৰিয়াৰ সৃষ্টি কৰিছিল । একাংশই এই সিদ্ধান্তৰ সমৰ্থন কৰিছিল যদিও আন একাংশই এই সিদ্ধান্তৰ বিৰোধিতা কৰিছিল । কিন্তু তাৰে মাজতে মহাবিদ্যালয় কেইখনক বিশ্ববিদ্যালয়লৈ উন্নীতকৰণৰ প্ৰক্ৰিয়া অব্যাহত থকাৰ সময়তে ৰাজ্যৰ উচ্চ শিক্ষা বিভাগে এক জাননীৰ জৰিয়তে সেই সিদ্ধান্ত বাতিল কৰাৰ কথা সদৰী কৰিছে ।
শিক্ষামন্ত্ৰী ৰণোজ পেগুৰে হোৱা আলোচনাৰ অন্তত এই সিদ্ধান্ত গ্ৰহণ কৰা হৈছে । উচ্চ শিক্ষা বিভাগৰ অতিৰিক্ত সচিব কবিতা ডেকাই আঠখন মহাবিদ্যালয়ক বিশ্ববিদ্যালয়লৈ উন্নিতকৰণৰ পূৰ্বৰ ঘোষণা বাতিল কৰাৰ কথা অৱগত কৰিছে । এই সন্দৰ্ভত সংশ্লিষ্ট মহাবিদ্যালয় কেইখনৰ অধ্যক্ষলৈ পত্ৰ প্ৰেৰণ কৰা হৈছে ।
লগতে পঢ়ক :Upgrade College into University: 8খন মহাবিদ্যালয়ক বিশ্ববিদ্যালয় কৰাৰ আঁৰত ব্যক্তিগত খণ্ডলৈ হস্তান্তৰৰ পৰিকল্পনা নেকি?
উল্লেখ্য যে, ২০২৩-২৪ বৰ্ষৰ বাজেট ভাষণত বিত্তমন্ত্ৰী অজন্তা নেওগে এইবছৰ আইন প্ৰণয়ন কৰি অসম চৰকাৰে ৰাজ্যৰ ৮ খন গুৰুত্বপূৰ্ণ মহাবিদ্যালয়ক বিশ্ববিদ্যালয়লৈ উন্নীত কৰাৰ বাবে সিদ্ধান্ত গ্ৰহণ কৰিছে বুলি ঘোষণা কৰিছিল । বিত্তমন্ত্ৰী অজন্তা নেওগে ১৬ মাৰ্চত দাখিল কৰা ২০২৩-২৪ বৰ্ষৰ বাজেটত প্ৰজ্ঞান ভাৰতী আঁচনিৰ অধীনত ৫ নম্বৰ শিতানত এই ঘোষণা কৰিছিল ।
আঁচনিৰ আনবোৰ ঘোষণাকে ধৰি বিশ্ববিদ্যালয়সমূহৰ ভৱন আৰু আন্তঃগাঁথনিৰ বাবে ১২০০ কোটি টকা বাজেটত ধার্য কৰা হৈছিল । সেই সময়ত চৰকাৰী সেই ঘোষণাক লৈ বহু প্ৰশ্ন উত্থাপন হৈছিল । বহুতেই সন্দেহৰ দৃষ্টিৰে চাইছিল সেই ঘোষণাক । সেই ঘোষণাক নতুন শিক্ষা নীতিৰ আধাৰত ব্যক্তিগতকৰণৰ প্ৰথম পদক্ষেপ বুলি অভিযোগ কৰিছিল বিভিন্ন দল-সংগঠন আৰু ব্যক্তি বিশেষে ।
আনহাতে, আন্তঃগাঁথনিৰ নামত কেৱল ভৱন কিছুমান নির্মাণ কৰিলেই বিশ্ববিদ্যালয়ৰ মৰ্যাদা লাভ নকৰে বুলি বিভিন্নজনে সেই সময়ত মত প্ৰকাশ কৰিছিল । কাৰণ ৰাজ্য চৰকাৰে বিশ্ববিদ্যালয়লৈ উন্নীত কৰা হোজাই কলেজ, বজালী কলেজ, নাৰায়ণপুৰৰ মাধৱদেৱ কলেজ আদিৰ আন্তঃগাঁথনি উন্নতি ঘটাই বিশ্ববিদ্যালয় পর্যায়ৰ কৰিব পৰা নাই চৰকাৰে । যাৰ বাবে সেই সময়ত সেই ঘোষণাকলৈ প্ৰতিক্ৰিয়াৰ সৃষ্টি হৈছিল । কিন্তু এতিয়া হঠাতে কিয় চৰকাৰে বাজেটৰ সেই ঘোষণা বাতিল কৰিলে তাকলৈ ৰহস্যৰ সৃষ্টি হৈছে ।
লগতে পঢ়ক :SI Junmoni Rabha death case update : নগাঁৱত CBI ৰ দল, কেবাগৰাকী আৰক্ষী বিষয়াক জেৰা চলোৱাৰ সম্ভাৱনা
