গুৱাহাটী, ২৩ জুলাই: ৰাজ্যৰ বিৰোধী শিবিৰত বোকা ছটিওৱাৰ ৰাজনীতিৰ লগতে অন্তঃকন্দলত জৰ্জৰিত হৈ বহুধাবিভক্ত হৈ থকাৰ সময়তে অতি সংগোপনে বিজেপিয়ে ২০২৪ৰ নিৰ্বাচনীক লৈ অতি পৰিকল্পিতভাৱে যুঁজত নামি পৰিছে (Assam BJP special drive for upcoming Lok Sabha election)। সমগ্ৰ দেশৰ লগতে অসমৰো চৈধ্যটা লোকসভা সমষ্টিত শাসক দল বিজেপিয়ে সংগোপনে আধুনিক প্ৰযুক্তিৰে যুগুতাইছে নিৰ্বাচনী ৰণকৌশল । সেই অনুসৰি ইতিমধ্যে বিজেপিয়ে ৰাজ্যৰ চৈধ্যটা সমষ্টিত 'বুথ সশক্তিকৰণ' (Booth Strength) প্ৰক্ৰিয়া চলাইছে ।
লোকসভা নিৰ্বাচনলৈ এতিয়াও মাজত প্ৰায় বিশ মাহ সময় বাকী। এনে প্ৰেক্ষাপটতে ৰাজ্যৰ বহুধাবিভক্ত বিৰোধী ৰাজনৈতিক দলসমূহে একপ্ৰকাৰ নিঃপালি দি থকাৰ বিপৰীতে অতি কৌশলেৰে বিজেপি সাংগঠনিকভাৱে জঁপিয়াই পৰিছে চৈধ্যটা লোকসভা সমষ্টিত । 'বুথ সশক্তিকৰণ' প্ৰক্ৰিয়াৰ জৰিয়তে শাসক দলটোৱে পৰৱৰ্তী লোকসভা নিৰ্বাচনলৈ বিশ মাহ সময় থকা অৱস্থাতে কার্যতঃ আৰম্ভ কৰিলে নিৰ্বাচনী প্ৰস্তুতি । ১৩ আৰু ১৪ জুলাইত ৰাজ্যৰ চৈধাটা লোকসভা সমষ্টিতে চলা 'বুথ সশক্তিকৰণ’ প্ৰক্ৰিয়াত বিজেপিৰ ৯ জন সাংসদে নিজ নিজ সমষ্টিত নেতৃত্ব দিয়াৰ বিপৰীতে বর্তমান বিজেপিৰ দখলত নথকা আন পাঁচটা লোকসভা সমষ্টিত পাঁচজন সাংসদ তথা কেন্দ্ৰীয় মন্ত্ৰীয়ে নেতৃত্ব দিলে ।
সেই অনুসৰি কংগ্ৰেছৰ দখলত থকা কলিয়াবৰ লোকসভা সমষ্টিত কেন্দ্ৰীয় জাহাজ, বন্দৰ, জলপৰিবহণ তথা আয়ুস দপ্তৰৰ কেন্দ্ৰীয় মন্ত্ৰী সৰ্বানন্দ সোণোৱালে, এ আই ইউ ডি এফৰ দখলত থকা ধুবুৰী লোকসভা সমষ্টিত ৰাজ্যসভাৰ সাংসদ তথা মুখ্যমন্ত্ৰীৰ ৰাজনৈতিক সচিব পবিত্ৰ মাৰ্ঘেৰিটাই, কংগ্ৰেছৰ দখলত থকা বৰপেটা লোকসভা সমষ্টিত ৰাজ্যসভাৰ সাংসদ ভুবনেশ্বৰ কলিতাই, কংগ্ৰেছৰ দখলত থকা নগাঁও লোকসভা সমষ্টিত ৰাজ্যসভাৰ সাংসদ কামাখ্যা প্ৰসাদ তাছাই আৰু মিত্ৰদলৰ দখলত থকা কোকৰাঝাৰ লোকসভা সমষ্টিত কেন্দ্ৰীয় মন্ত্ৰী ৰামেশ্বৰ তেলীয়ে সেই সাংগঠনিক প্ৰক্ৰিয়াত নেতৃত্ব প্ৰদান কৰে ।
‘বুথ সশক্তিকৰণ’ প্ৰক্ৰিয়াৰ জৰিয়তে বিজেপিয়ে ৰাজ্যৰ আটাইকেইটা লোকসভা সমষ্টিত ২০১৪ চনৰ পিছৰে পৰা অনুষ্ঠিত প্ৰতিটো লোকসভা, বিধানসভা নিৰ্বাচনৰ উপৰি স্থানীয় নিগম-নিকায়, পঞ্চায়ত নিৰ্বাচনৰ ফলাফলৰ বিজ্ঞানসম্মত পৰ্যালোচনা আৰম্ভ কৰিছে । লোকসভা সমষ্টিসমূহৰ অন্তৰ্গত প্ৰতিটো বুথ কেন্দ্ৰত ২০১৪ চনৰে পৰা এতিয়ালৈকে পৰৰ্বতী নিৰ্বাচনসমূহত বিজেপিৰ কিমান ভোট কমিল, কিমান বাঢ়িল । আধুনিক প্ৰযুক্তিৰে ইয়াৰ বিজ্ঞানসন্মত কাৰণ চিনাক্তকৰণ, সেই কাৰণসমূহৰ বিশ্লেষণ আৰু তাৰ ভিত্তিত পদক্ষেপ গ্ৰহণ কৰাৰ লক্ষ্যৰে শাসক দলটোৱে চৈধ্যটা সমষ্টিত এই ‘বুথ সশক্তিকৰণ’ আৰম্ভ কৰিছে ।
এই ‘বুথ সশক্তিকৰণ' বৈঠকসমূহত লোকসভা সমষ্টি সমিতিসমূহৰ অন্তর্গত প্ৰতিটো বিধানসভা সমষ্টিৰ পৰা ১৩-১৪ জনকৈ আৰু সামগ্ৰীকভাৱে লোকসভা সমষ্টিটোৰ পৰা ৩৪-৩৫ লোকে অংশগ্ৰহণ কৰিছে । তেওঁলোকে প্ৰতিটো বুথ কেন্দ্ৰলৈ গৈ বিগত আঠ বছৰত অনুষ্ঠিত নিৰ্বাচনসমূহত বিজেপিৰ কোন বুথত কিমান ভোট বাঢ়িল, কোন বুথত কিমান ভোট কমিল তাৰ বিজ্ঞানসম্মত অধ্যয়ন কৰি প্ৰতিবেদন দাখিল কৰিব । তদুপৰি প্ৰতিটো বুথ কেন্দ্ৰতে ভোটাৰৰ পৰা ভোটাৰলৈ জনসম্পৰ্ক বিকাশৰো পদক্ষেপ লোৱাৰ ব্যৱস্থা কৰিছে শাসকীয় দলটোৱে ।