গুৱাহাটী, ২৭ নৱেম্বৰ: তিৱা স্বায়ত্ব পৰিষদৰ নিৰ্বাচনক কেন্দ্ৰ কৰি তুংগত উঠিছে ৰাজনৈতিক দলৰ তৎপৰতা । সম্প্ৰতি বিজেপিৰ দখলত থকা পৰিষদখন যাতে পুনৰ নিজৰ দখলত থাকে তাৰ বাবে গেৰুৱা দলটোৱে চেষ্টাৰ কোনো ক্ৰুটি কৰা নাই । পৰিষদৰ অন্তৰ্গত আটাইকেইটা সমষ্টিৰ পৰা প্ৰতিদ্বন্দিতা কৰিছে শাসকীয় দলটোৱে । শেহতীয়াকৈ ৰাজ্যিক নিৰ্বাচন আয়োগে পৰিষদৰ অন্তৰ্গত ১১ টা সমষ্টিৰ পূৰ্বৰ সংৰক্ষণৰ ব্যৱস্থাত কেতবোৰ সালসলনি ঘটোৱাৰ বাবে মনোনয়ন দাখিলৰ অন্তিম দিনো পিছুৱাবলগীয়া হৈছে । সেই অনুসৰি ২৮ নৱেম্বৰৰ দিনটো মনোনয়ন দাখিলৰ অন্তিম দিন হিচাপে ধাৰ্য কৰা হৈছে ।
অহা ১ ডিচেম্বৰত মনোনয়ন পৰীক্ষা কৰাৰ হ'ব আৰু মনোনয়ন প্ৰত্যাহাৰৰ শেষ দিন হৈছে অহা ৩ ডিচেম্বৰ । আনহাতে, নতুনকৈ সংৰক্ষণ ব্যৱস্থা সালসলনি কৰা ১১ টা সমষ্টিৰ ভিতৰত পূৰ্বতে মুক্ত হৈ থকা বৰংগনি সমষ্টি অনুসূচিত জনজাতিৰ বাবে, মুক্ত সমষ্টি ভূৰবন্ধা অনুসূচিত জনজাতিৰ বাবে, মুক্ত সমষ্টি তেতেলীয়া অনুসূচিত জনজাতিৰ বাবে, অনুসূচিত জনজাতিৰ বাবে সংৰক্ষিত হৈ থকা শলমাৰী সমষ্টি মুক্ত ৰূপে, মুক্ত হৈ থকা সমষ্টি ভোমোৰাগুৰি সমষ্টি অনুসূচিত জনজাতিৰ বাবে, মুক্ত হৈ থকা বৰচিলা সমষ্টি অনুসূচিত জনজাতিৰ বাবে, মুক্ত হৈ থকা বাৰপূজীয়া সমষ্টি অনুসূচিত জনজাতিৰ বাবে, অনুসূচিত জনজাতিৰ বাবে সংৰক্ষিত কাকী সমষ্টি মুক্ত ৰূপে ৰাজ্যিক নিৰ্বাচন আয়োগে ঘোষণা কৰিছে ।