গুৱাহাটী, ২৫ নৱেম্বৰ: মূল্যবৃদ্ধিয়ে কোঙা কৰা ৰাজ্যবাসীৰ বাবে আন এক বেয়া খবৰ । অত্যাৱশ্যকীয় খাদ্য সামগ্ৰী, ইন্ধনৰ পিছত এইবাৰ প্ৰতি ইউনিট বিদ্যুতৰ মাচুল বৃদ্ধিৰ সিদ্ধান্ত গ্ৰহণ কৰিছে অসম শক্তি বিতৰণ কোম্পানী লিমিটেড চমুকৈ এ পি ডি চি এলে (APDCL)। উল্লেখ যে দিছপুৰ দিল্লীত ব্যস্ত থকাৰ সময়তে সন্তর্পণে বৃদ্ধি কৰা হ’ল প্ৰতি ইউনিট বিদ্যুতৰ মাচুল (Assam power tariff hike) ।
ৰাজ্য চৰকাৰৰ অধীনস্থ অসম শক্তি বিতৰক কোম্পানী লিমিটেড চমুকৈ এ পি ডি চি এলে এক জাননী জাৰি কৰি সকলো ধৰণৰ বিদ্যুৎ মাচুলৰ প্ৰতি ইউনিটত ৭৯ পইচালৈ বৃদ্ধি কৰিছে (APDCL hikes power tariff) । ডিচেম্বৰ মাহৰ পৰা গ্ৰাহকে এই বৰ্ধিত বিদ্যুৎ মাচুল আদায় দিব লাগিব । ডিচেম্বৰৰ পৰা ফেব্ৰুৱাৰী পর্যন্ত তিনি মাহৰ বাবে এই বৰ্ধিত বিদ্যুৎ মাচুল বাহাল থাকিব বুলি এ পি ডি চি এলৰ জাননীত উল্লেখ কৰিছে ।
উল্লেখ্য এ পি ডি চি এলে প্ৰতি ইউনিট বিদ্যুতৰ মাচুল ৩০ পইচাৰ পৰা একেকোবে এনেদৰে ৭৯ পইচালৈ বৃদ্ধি কৰিলে । অর্থাৎ প্ৰতি ইউনিটত ৪৯ পইচা বিদ্যুৎ মাচুল বৃদ্ধি পালে । স্বাভাৱিকতে এই বিদ্যুৎ মাচুল বৃদ্ধিয়ে গ্ৰাহকৰ ওপৰত ৰাম টাঙোন সোধাব । এ পি ডি চি এলে জাননীত উল্লেখ কৰা অনুসৰি ইন্ধন আৰু শক্তি ক্ৰয়ৰ খৰচ বহন কৰিবলৈয়ে মাচুল বৃদ্ধিৰ সিদ্ধান্ত গ্ৰহণ কৰা হৈছে ।
ঋণৰ ওপৰত বৰ্তী থকা চৰকাৰখনে সৰ্বসাধাৰণৰ ওপৰত ইটোৰ পাছত সিটো কৰৰ বোজা জাপি দি অব্যাহত ৰাখিছে ৰাজকীয় লাহবিলাহ । উল্লেখ যে নিয়মীয়া বিদ্যুৎ যোগান ধৰাত ব্যৰ্থ হোৱা শক্তি বিভাগে মাচুল বৃদ্ধিৰে উপভোক্তাক মাধমাৰ শোধোৱাৰ ব্যৱস্থা কৰি আহিছে । উল্লেখ যে আগষ্ট-ছেপ্টেম্বৰ মাহত অস্বাভাৱিকভাৱে উপভোক্তাৰ বিদ্যুতৰ বিল বৃদ্ধি পোৱাক লৈ ৰাজ্যজুৰি সৃষ্টি হৈছিল তীব্ৰ বিতৰ্কৰ । প্ৰায় ৪০-৫০ শতাংশকৈ বিদ্যুতৰ বিল বৃদ্ধি হোৱাত শক্তি বিভাগৰ বিৰুদ্ধে উত্থাপিত হৈছিল একাধিক অভিযোগ ।
এনে অভিযোগৰ পাছতে কিছু নৰম হোৱা অসম শক্তি বিতৰণ কোম্পানীয়ে (এ পি ডি চি এল) বিদ্যুতৰ বিল পৰীক্ষা কৰাৰ প্ৰস্তাৱ দিছিল । এনে প্ৰস্তাৱ কাৰ্যকৰীকৰণ সম্পূৰ্ণ নোহোৱাৰ পূৰ্বেই এ পি ডি চি এলে এইবাৰ পুনৰ ৭৯ পইচাকৈ প্ৰতি ইউনিটত বিদ্যুৎ মাচুল বৃদ্ধি কৰিছে । ফুৱেল এণ্ড পাৱাৰ পাৰ্ছেছ প্ৰাইজ এডজাষ্টমেন্ট (এফ পি পি পি এ) ব্যৱস্থাৰ অধীনত বিদ্যুৎ মাচুল বৃদ্ধিৰ সিদ্ধান্ত গ্ৰহণ কৰা হৈছে । এ পি ডি চি এলৰ সূত্ৰই প্ৰকাশ কৰা অনুসৰি বিগত সময়ছোৱাত বিদ্যুৎ ক্ৰয় আৰু বিভিন্ন শক্তি প্রকল্প চলোৱাৰ ক্ষেত্ৰত বৃদ্ধি হোৱা ব্যয়ৰ জোৰা মাৰিবলৈ এই ব্যৱস্থাৰ অধীনত মাচুল বৃদ্ধি কৰা হৈছে ।
এই বৰ্ষৰ এপ্ৰিল মাহত মাচুল বৃদ্ধিৰ পাছত পুনৰ এ পি ডি চি এলে ঘাটি জোৰা মাৰিবলৈ প্ৰতি ইউনিটত ৭৯ পইচাকৈ বিদ্যুৎ মাচুল বৃদ্ধি কৰাত স্বাভাৱিকতে সৃষ্টি কৰিছে তীব্ৰ প্ৰতিক্ৰিয়াৰ । গ্ৰাহকক নিয়মিতভাৱে বিদ্যুৎ যোগান ধৰিব নোৱাৰা শক্তি বিভাগে বিভিন্ন অজুহাতত প্ৰায়ে বৃদ্ধি কৰি আহিছে মাচুল ।
লগতে পঢ়ক:TMC protest in Dhubri: মূল্যবৃদ্ধি আৰু অত্যাধিক পৌৰকৰ নিয়ন্ত্ৰণৰ দাবীত TMC ৰ প্ৰতিবাদ
