গুৱাহাটী, ৩ অক্টোবৰ: জনপ্ৰিয়তা বৃদ্ধি পাইছে কংগ্ৰেছ দলৰ । গুৱাহাটীত মঙলবাৰে সাংবাদিকৰ আগত এই দাবী কৰে অসম প্ৰদেশ কংগ্ৰেছৰ সভাপতি ভূপেন বৰাই । তেওঁ কয় যে এতিয়া বিজেপিৰ মন্ত্ৰীসকল দূৰৈৰ কথা, খোদ মুখ্যমন্ত্ৰী হিমন্ত বিশ্ব শৰ্মাৰে আগন্তক লোকসভা নিৰ্বাচনত পৰাজয়ৰ ভয়ত বুকু কঁপি আছে । তেওঁলোকৰ মুখতহে জোৰ আছে, কিন্তু বুকুত জোৰ নাই ।
প্ৰদেশ কংগ্ৰেছৰ সভাপতিগৰাকীয়ে কয় যে একাংশ বিজেপি নেতা-কৰ্মীয়ে কংগ্ৰেছৰ আত্মবিশ্বাস বৃদ্ধি কৰি আছে । বিজেপিৰ এগৰাকী প্ৰভাৱশালী নেতাই শীঘ্ৰেই কংগ্ৰেছত যোগদান কৰিব বুলি সংবাদ মাধ্যমক জনাই ভূপেন বৰাই ।
তেওঁ কয় যে, অসমৰ বিভিন্ন প্ৰান্তৰ বিভিন্ন ৰাজনৈতিক দলৰ নেতা-কৰ্মীৰ লগতে জাতীয় সংগঠনৰ নেতা-কৰ্মী, একাংশ অৱসৰপ্ৰাপ্ত চৰকাৰী বিষয়া-কৰ্মচাৰীয়ে বিজেপিৰ অপশাসনৰ প্ৰতি অতিষ্ঠ হৈ কংগ্ৰেছ দলত যোগদান কৰাৰ ইচ্ছা প্ৰকাশ কৰি আছে । আনকি কেইজনমান এ চি এছ বিষয়াই চাকৰিৰ পৰা পদত্যাগ কৰি কংগ্ৰেছত যোগদান কৰাৰ ইচ্ছা প্ৰকাশ কৰি আছে ।