গুৱাহাটী, ১ নৱেম্বৰ: নিখিল ভাৰত কংগ্ৰেছ কমিটীৰ নিৰ্দেশ মৰ্মে সোমবাৰৰ পৰা প্ৰদেশ কংগ্ৰেছে সমগ্ৰ ৰাজ্য জুৰি আৰম্ভ কৰিছে সদস্যভৰ্তি অভিযান । প্ৰদেশ কংগ্ৰেছৰ মুখ্য কাৰ্যালয় ৰাজীৱ ভৱনত সোমবাৰে এই অভিযানৰ শুভাৰম্ভণি কৰে দলটোৰ কাৰ্যকৰী সভাপতি ৰাণা গোস্বামীয়ে । এই বিশেষ সদস্যভৰ্তি অভিযান প্ৰতিটো ব্লক, মণ্ডল, জিলা পৰ্যায়ৰ পৰা চলিব বুলি মন্তব্য কৰে কাৰ্যকৰী সভাপতিগৰাকীয়ে ।
উল্লেখ্য যে, এই অভিযানৰ সফল কাৰ্যকৰীকৰণৰ বাবে ইতিমধ্যে দলৰ সভাপতি ভূপেন বৰাই ৰাণা গোস্বামীক সভাপতি আৰু পাৰ্থপ্ৰতিম বৰাক আহ্বায়ক হিচাপে লৈ এখন সমিতি গঠন কৰি দিছে । ৰাণা গোস্বামীয়ে আজি কয় যে, এই সদস্যভৰ্তি অভিযান ২০২২ চনৰ ৩১ মাৰ্চলৈকে চলিব । এই সময়চোৱাত অসমৰ প্ৰতিটো বিধানসভা সমষ্টিত কমেও ২৫ হাজাৰ জন সদস্য ভৰ্তি কৰিবলৈ লক্ষ্য স্থিৰ কৰা হৈছে । সমগ্ৰ অসমত সৰ্বমুঠ ৩৩ লাখ সদস্যভৰ্তি কৰা হ'ব ।