গুৱাহাটী, ১০ নৱেম্বৰ :মুখ্যমন্ত্ৰী হিমন্ত বিশ্ব শৰ্মা চৰকাৰৰ পৃষ্ঠপোষকতাতে মাৰ্ঘেৰিটাত কয়লাৰ অবৈধ খনন চলি আছে । এই অভিযোগ প্ৰদেশ কংগ্ৰেছৰ । শুকুৰবাৰে প্ৰদেশ কংগ্ৰেছৰ সামাজিক মাধ্যমৰ অধ্যক্ষ ৰাতুল কলিতাই গুৱাহাটীৰ ৰাজীৱ ভৱনত এখন সংবাদমেল সম্বোধন কৰি কয়লা ছিণ্ডিকেটক লৈ সৰৱ হৈ পৰে ।
ৰাতুল কলিতাই কয় যে হিমন্ত বিশ্ব শৰ্মা চৰকাৰখন কয়লা ছিণ্ডিকেটৰ ওপৰতে চলি আছে আৰু মুখ্যমন্ত্ৰীয়ে কয়লা ছিণ্ডিকেটৰ টকাৰে উৰাজাহাজত ঘূৰি আছে । তেওঁ লগতে কয় যে কিছুদিন পূৰ্বে বিধায়ক সুৰেন ফুকনে ছিণ্ডিকেটৰ গাড়ী ডিগবৈত বন্ধ কৰি দিছিল আৰু ইয়াৰ পাচত মাৰ্ঘেৰিটাৰ বিধায়ক ভাস্কৰ ফুকনে কয়লা ছিণ্ডিকেটৰ সেই গাড়ীসমূহ পাৰ কৰি দিয়াৰ ব্যৱস্থা কৰিলে ।
কলিতাই লগতে কয় যে বৰ্তমান সময়ত ডিগবৈ, মাৰ্ঘেৰিটা আৰু শদিয়াৰ বিধায়কৰ মাজত কয়লা ছিণ্ডিকেটক লৈ কাজিয়া চলি আছে । কংগ্ৰেছ চৰকাৰৰ দিনত প্ৰয়াত মুখ্যমন্ত্ৰী তৰুণ গগৈয়ে কয়লাৰ খনন বন্ধ কৰি দিয়াৰ বাবেই ছিণ্ডিকেট চলাই থকাসকলে বিসম্বাদ কৰিছিল বুলি সদৰী কৰি তেওঁ কয় যে পৰৱৰ্তী সময়ত ছিণ্ডিকেট পাৰ্টীটো বিজেপিলৈ গৈছিল ।