চৰকাৰক কৰ'ণাৰ বিৰুদ্ধে যুঁজিবলৈ সহযোগ কৰিব সকলো ৰাজনৈতিক দলে !

কৰ'ণাৰ বিৰুদ্ধে যুঁজ দিয়াৰ বাবে গুৱাহাটীত মুখ্যমন্ত্ৰীৰ আহ্বানত সৰ্ব দলীয় বৈঠক ৷ চৰকাৰক পূৰ্ণ সহযোগিতা আগবঢ়োৱাৰ প্ৰতিশ্ৰুতি সকলো ৰাজনৈতিক দলৰ ৷

গুৱাহাটী, ১২ এপ্ৰিল:কৰ'ণা ভাইৰাছে সৃষ্টি কৰা প্ৰত্যাহ্বান কিদৰে অতিক্ৰম কৰিব পাৰি সেই বিষয়ে পৰামৰ্শ গ্ৰহণ কৰিবলৈ দেওবাৰে মুখ্যমন্ত্ৰী সৰ্বানন্দ সোণোৱালে আহ্বান জনায় এখন সৰ্বদলীয় বৈঠক ৷ উক্ত বৈঠকত সকলো ৰাজনৈতিক দলে এই যুঁজত চৰকাৰক পূৰ্ণ সহযোগিতা আগবঢ়োৱাৰ প্ৰতিশ্ৰুতি দিয়ে । দেওবাৰে দিনৰ ১১ বজাৰ পৰা অসম প্ৰশাসনিক পদাধিকাৰী মহাবিদ্যালয়ত আৰম্ভ হোৱা এই সৰ্বদলীয় বৈঠক প্ৰায় চাৰি ঘন্টা জুৰি চলে ।

বৈঠকৰ অন্তত মুখ্যমন্ত্ৰী সোণোৱালে সংবাদ মাধ্যমক কয় যে, সকলো ৰাজনৈতিক দলেই এই বৈঠকত চৰকাৰৰ সৈতে হাতে হাত ধৰি আগুৱাই যোৱাৰ সিদ্ধান্ত লয় আৰু কৰ'ণা মহামাৰীক প্ৰতিহত কৰাৰ পণ লয় । সৰ্বদলীয় বৈঠকে কৰ'ণাৰ বিৰুদ্ধে চলা এই যুঁজত নিজৰ জীৱনকো তুচ্ছ জ্ঞান কৰি কাম কৰি যোৱা চিকিৎসক, নাৰ্চকে ধৰি সকলো জৰুৰীকালীন সেৱাৰ সৈতে জড়িত লোকক ধন্যবাদ জ্ঞাপন কৰে । তাৰোপৰি এই বৈঠকত লক্ ডাউন বৃদ্ধি সম্পৰ্কেও বিভিন্ন ৰাজনৈতিক দলে পৰামৰ্শ দাঙি ধৰে ।

লগতে পঢ়ক : শিশুসকলক কৰ'ণা মহামাৰীৰ বিষয়ে সজাগ কৰিবলৈ প্ৰস্তুত গল্পপুথি